UJUMBE KUTOKA KWA MABINTI: "UCHAGUZI MWEMA WATANZANIA WENZETU !"

• Naona tumefanikiwa kuwaaminisha mabinti hawa kwamba, japo walizaliwa hapa, kimsingi wao bado ni Watanzania na ni muhimu wautambue utamaduni wa Kitanzania (ikiwemo lugha ya Kiswahili). Matunda ya juhudi hizi tumeanza kuyaona kwani sasa wanajivunia kuwa na wazazi wanaotoka Tanzania, wanajibidisha sana kujifunza Kiswahili na hawauonei aibu utamaduni uliowakuza na kuwalea wazazi wao!

• Malaika hawa wa Mungu basi wanawatakia Watanzania wote uchaguzi mwema na wa amani leo hii. Nasi tunaungana nao na kuendelea kumwomba Mungu Aendelee kuibariki nchi yetu na kuipa "Mnyanyua Mikono" mwenye upeo mkubwa na mwenye uchungu wa dhati na nchi yetu. Kila la heri Watanzania wenzetu. Mungu Awabariki sana!!!

VIAPO NJE NJE HATA KABLA YA UCHAGUZI

Picha kwa hisani ya Michuzi

FIKRA YA IJUMAA: UJUMBE WANGU KWA WANYANYUAJI NA WANYANYULIWA MIKONO

 KWENU MLIONYANYULIWA MIKONO (I)

• Kwenu mliokubali mikono yenu ikanyanyuliwa na wanyanyua mikono. Ipi ni sababu hasa iliyowafanya mkubali mikono yenu inyanyuliwe? Lengo, wajibu na jukumu lenu hasa ni nini? Je ahadi mlizozitoa ni za kweli? Mtazikumbuka na kuzitekeleza?

 *************......*************

KWENU MLIONYANYULIWA MIKONO (II)

• Zipo tetesi kwamba wengi wenu mmezikimbia taaluma zenu na kuhakikisha kwamba mikono yenu inanyanyuliwa kwa sababu ya marupurupu na posho hizi nono kupindukia. Kama lengo lenu la msingi ni hizi posho na marupurupu haya ya kilafi; na madaraka mengine mtakayoyapata, basi historia itawahukumu kwa kuwasaliti watu wenu waliowatuma na kuwabariki katika safari yenu ya kunyanyuliwa mikono na hatimaye kwenda "tafrijani" Chimwaga.

*************......*************

KWENU MLIONYANYULIWA MIKONO (III): WAKUMBUKENI NA HAWA

• Hawa chini nao ni Watanzania kama nyinyi. Hawa ndiyo waajiri wenu (japo pengine hawajui). Hawa ndiyo wanaolipia hayo magari yenu ya fahari na hizo posho na marupurupu manono. Nashawishika kuamini kwamba wengi wenu lengo lenu kuu ni kuleta mabadiliko ya kweli na kuhakikisha kwamba hali za maisha za watu waliowatuma yanaboreka. Wekeni maslahi ya waajiri wenu hawa mbele, wateteeni kwa moyo na nguvu zenu zote ili baada ya miaka mitano ijayo mkaweze tena kusimama kifua mbele na "kujimwambafai" kwa maendeleo mliyowaletea.

*************......************* 

KWENU WANYANYUA MIKONO (I)

• Mliponyanyua mikono ya wanyanyuliwa mikono wenu na kuwaomba wananchi wawachague ilikuwa ni ishara kwamba mnawaamini wanyanyuliwa mikono wenu. Ndiyo maana minong'ono ya kutoridhika ilisikika mliponyanyua mikono ambayo wanajamii wengine walidhani ni michafu na kamwe isingestahili kunyanyuliwa nanyi. Kama tetesi hizi ni za kweli, basi tambueni kwamba kwa kufanya hivyo mmechafua pia mikono yenu na kujitia unajisi; na kwa kuwa hawa ndio mtakaowapa madaraka makubwa, wakiboronga (na pengine walishawahi kuboronga) hamtakwepa lawama za kuboronga kwao. Kuweni wakali na hakikisheni kwamba wanyanyuliwa mikono wenu wanatenda na kutekeleza yale mliyowatuma wakayatende na kuyatekeleza yaani kuinua hali ya maisha ya Watanzania wote (kama kweli hili ndilo lengo lenu). Ukuaji wa matabaka kati ya masikini (ambao ndiyo wengi) na matajiri wachache inabidi udhibitiwe. Mustakabali wa taifa zima - la wakati huu na  wakati ujao - unategemea maamuzi na uongozi wenu. Nendeni mkazitimize na kuzitekeleza ahadi mlizozitoa (kama zinatekelezeka!). 

*************......*************

KWENU WANYANYUA MIKONO (II)

• Ninategemea kwamba Ubinadamu, unyenyekevu, upendo na umakinifu mliouonyesha wakati wa kampeni na kwingineko utaendelea kujionyesha na kujidhihirisha kupitia mikakati imara itakayowaletea wananchi maendeleo ya kudumu. Kifanyeni kipindi cha miaka mitano ijayo kuwa cha vuguvugu kali la kuleta maendeleo ya kweli na ambayo hayajawahi kuonekana tangu nchi yetu ijipatie uhuru. Hatima ya Tanzania inategemea uongozi wenu. Historia ipo inawakodolea macho ninyi na vizazi vyenu!

*************......*************

KWENU WANYANYUA MIKONO (III)

• Bila kujali ni mnyanyua mikono yupi ataingia Ikulu, naomba na kutumaini kwamba miaka mitano ijayo itakuwa ya furaha, amani na matumaini kama inavyoonekana kudokezwa na taswira hapa chini. Hebu furaha, amani na matumaini yakawafikie walio wengi na hasa Watanzania wa kawaida. 

*************......*************

• Japo mimi sitaweza kupiga kura, nawatakieni Watanzania wenzangu wote uchaguzi wa amani na utulivu. Mungu na Atupatie kiongozi mwenye uoni, kiongozi mwenye uchungu na nchi hii pamoja na maendeleo ya watu wake, kiongozi anayeumia na kukosa usingizi anapoona wananchi wake wakiishi katika umasikini wa kutisha, kiongozi ambaye atatuongoza kuelekea katika "nchi ya ahadi" bila kutetereka wala kumakinikia maslahi ya watu wachache tu katika jamii, kiongozi ambaye ataendelea kulinda na kudumisha mshikamano na amani  tuliyonayo. Mungu Ibariki Tanzania!

*************.....*************