MATONDO

"MACHO YAKO MBONA HAYATULII MUME WANGU? WEWE LAZIMA UTAKUWA NA MWANAMKE WA NJE" !!!

2012-01-24T03:33:00.000+03:00

Katika tamaduni nyingi za makabila ya Kitanzania, kukaziana macho wakati wa mazungumzo ni jambo geni. Mara nyingi watoto hawaruhusiwi kuwatazama watu wazima usoni wakati wa mazungumzo. Kufanya hivyo ni ukosefu wa adabu. Hali kadhalika katika makabila mengi wanawake pia hawakupaswa kuwaangalia wanaume usoni wakati wa mazungumzo. Kufanya hivyo ilikuwa dalili ya uchakaramu.

Nakumbuka nilipofika hapa Marekani kuanza masomo swala hili lilinipa shida sana kwani nilikuwa siwezi kuongea na maprofesa, wanafunzi wenzangu na watu wengine huku nikiwa nimewakazia macho usoni. Nilizidi kuchanganyikiwa zaidi pale wasichana wa Kimarekani walipokuwa wakiongea nami huku wamenikazia macho usoni.

"Wasichana gani hawa wasio na aibu?" Nilikuwa nikijiuliza mara kwa mara.

Sikujua kuwa hili lilikuwa ni tatizo mpaka siku moja mshauri wangu aliponiita ofisini kwake na kuniambia kwamba watu walikuwa wakilalamika kwamba nilikuwa siwaangalii machoni wakati wa mazungumzo. Aliniambia kwamba kwa Wamarekani kuongea na mtu bila kumwangalia usoni ni jambo baya sana. Linaonyesha kwamba pengine unachokisema si cha kweli na kwamba wewe siyo mtu wa kuaminika.

Japo nilijibidisha sana kufanya mabadiliko na kuanza kuwakazia watu macho usoni wakati wa mazungumzo, ni lazima nikiri hapa kwamba hili halikuwa jambo rahisi. Na kusema kweli mpaka leo sijalizoea jambo hili na daima huwa sijisikii huru kufanya hivyo.

Ndiyo maana hii katuni kidogo imenishangaza. Pengine ni matokeo ya utandawazi na minyororo yake ya kitamaduni. Ni tangu lini mke na mume wa Kiswahili wakakaziana macho wakati wa mazungumzo? Pengine wanandoa wasomi wa mijini lakini siyo kule vijijini. Na simlaumu huyo baba kwenye katuni kwa kushindwa kwake kuhakikisha kwamba kunakuwa na "eye contact" kati yake na mkewe. Huu si utamaduni wetu na kwa sisi wazee hili ni jambo ambalo inabidi tujifunze kama kuna ulazima wa kufanya hivyo.

Kwa tofauti na mifano mbalimbali ya migongano ya kitamaduni kati ya Waafrika na Wazungu (hasa Wamarekani) jaribu sana kusoma kitabu mashuhuri cha Profesa Mbele kiitwacho Africans and Americans: Embracing Cultural Differences.

UTAFITI: WAKAZI WA NCHI ZA BARIDI WANA MACHO NA UBONGO MKUBWA KULIKO WAKAZI WA NCHI ZA JOTO

2012-01-23T06:06:00.002+03:00

Matokeo ya utafiti yaliyochapishwa mwaka jana yanaonyesha kwamba watu wanaoishi katika ukanda wa nchi za baridi juu ya mstari wa Ikweta wana macho na ubongo mkubwa zaidi kuliko wenzao wanaoishi karibu na mstari huo.

Kwa vile nchi nyingi za baridi mbali na mstari wa Ikweta zipo Ulaya, Urusi, Asia na Amerika ya Kaskazini, hii inamaanisha kwamba wakazi wa nchi hizi wana macho na ubongo mkubwa.

Na kwa vile sote tunajua kwamba ubongo mkubwa unahusianishwa moja kwa moja na akili nyingi, swali la muhimu linalozushwa na utafiti huu ni hili: Wakazi wa nchi za baridi (wengi wao ni weupe) wana akili kuliko wakazi wa sehemu zilizo karibu na Ikweta (weusi)?

Japo watafiti wamekwepa kufanya jumuisho hili, inavyoonekana wamefanya hivyo ili kukwepa mitafaruku tu. Je, ugunduzi huu mpya unaweza kueleza tofauti za kimaendeleo na kisayansi kati ya watu wa “kaskazini” na “kusini”?

Mgunduzi mwenza wa “DNA” mwenyewe alipata matatizo makubwa alipotoa dai kama hili mwaka 2007, dai ambalo lilimfanya afukuzwe au kujiuzulu nyadhifa zake zote za kisayansi na kiuongozi alizokuwa akizishikilia

Kwa maoni ya kutatanisha kuhusu mkondo huu wa mawazo tazama maoni ya binti machachari wa Kichaga aitwaye Aika HAPA. Maoni haya yaliwasha moto mkubwa sana huku wengine wakimshambulia na wengine wakimuunga mkono.

Wewe una maoni gani? Ni kweli watu weusi tuna akili “pungufu” tukilinganishwa na weupe?

KUTENDA KOSA SI KOSA, KOSA NI ........!!!

2012-01-22T11:56:00.000+03:00

Makosa mapya yanaonyesha kwamba unakua, unabadilika na unasonga mbele kifkra na kimaendeleo. Makosa mapya yanaonyesha kwamba unajaribu vitu vipya na katika kujaribu huko ndimo hatimaye mna mafanikio. Na kusema kweli makosa mapya ni ya lazima katika maisha yetu.

Na kama unajifunza kutokana na makosa hayo na kuepuka kuyarudia tena na tena basi hili ni jambo jema. Tangu hapo kutenda kosa siyo kosa isipokuwa kurudia kosa ati !

HATIMAYE IMEKUWA: DR. SLAA AKUTANA NA DR. J.K. ANA KWA ANA !!!

2012-01-22T02:09:00.003+03:00

Dr. Slaa akisalimiana na Dr. Kikwete ikulu jana. Ni picha ya

Kihistoria ama?

Makala ya Bwn. Ally Ulanga yaliyochapishwa kule Wanabidii nami nikayaweka HAPA yaliwasha moto mkali. Katika makala hayo, Bw. Ulanga alimlalamikia sana Dr. Slaa kutokana na kitendo chake cha "kukwepa" kukutana na Dr. Kikwete katika mazishi ya mbunge wa Chadema, Regia Mtema. Bwana Ulanga aliendelea kubainisha kwamba Dr. Slaa alikuwa hajawahi kukutana na Rais Dr. Kikwete ana kwa ana tangu alipogaragazwa katika uchaguzi mkuu uliopita.

Habari hizi pia ziliripotiwa na gazeti la Mwananchi. Habari za kidaku zikaendelea kusema kwamba Dr. Slaa alimkwepa Dr. Kikwete eti kwa sababu alikatazwa na mkewe kusalimiana na rais.

Nimefurahishwa na taarifa hizi kwamba Dr. Slaa hatimaye ametinga ikulu jana na kusalimiana ana kwa ana na rais Dr. Kikwete. Naamini kwamba jambo lililompeleka ikulu ni kubwa na la muhimu kwa maslahi ya taifa letu. Kwa hili Dr.Slaa na Dr. Kikwete wanastahili pongezi kwa kutuonyesha Watanzania kwamba pamoja na tofauti zao kali za kisiasa bado wanaweza kukaa pamoja na kujadili masuala muhimu yanayohusu taifa letu.

Ni lazima tuendeleze ule utamaduni wa kutatua matatizo na tofauti zetu kwa njia ya mazungumzo. Na kwa hili Dr. Slaa na Dr. Kikwete wameonyesha ukomavu mkubwa wa kisiasa !

Picha zote ni kutoka Jamii Forums

Soma maoni ya Mwanaharakati Mwl. Lwaitama kuhusu suala hili HAPA

HEBU ITAZAME VIZURI HII MELI ILIYOLALA. IFIKIRIE KAMA NI NCHI.....

2012-01-18T08:54:00.000+03:00

Meli kubwa hili la kifahari kwa jina Costa Concordia limelala chali ufukoni mwa bahari ya Tucsan kule Italy. Mpaka sasa watu 11 wameshathibitishwa kuwa wamefariki. Wengine 29 hawajulikani waliko. Lita za mafuta zipatazo 500,000 huenda zikamiminika baharini katika sehemu ambayo imetengwa kuwa mazalia salama ya nyangumi na pomboo (dolphins). Kwa nini ajali hii imetokea?

Inavyosemekana ni uzembe wa nahodha. Yeye aliacha kufuata ramani za njia aliyopangiwa na badala yake akaisogeza meli karibu na pwani zaidi ili kujionyesha. Kwa kufanya hivyo meli ikagota kwenye mwamba. Ajali ikatokea. Na kibaya zaidi, nahodha mwenyewe akatimua mbio na kulitelekeza jukumu lake la kuhakikisha kwamba kila abiria ameokolewa.

Ni manahodha wangapi waliwahi kuangusha meli za nchi zao kama huyu nahodha mchovu wa Costa Concordia? Wafikirie akina Mobutu, akina Bokassa, akina Idd Amin, akina Banda, akina ......Afrika ina msururu mrefu wa manahodha wazembe waangusha meli. Tanzania je? Tuna bahati ama?

Pengine maswali ya kujiuliza ni haya: Abiria wanastahili lawama katika uzembe huu wa manahodha wao? Kwa nini mtu mmoja awe na madaraka makubwa ya kusogeza meli karibu na miamba na hakuna mtu wa kumkataza? Wakati unaposoma makala haya mafupi unajua meli ya bara lako na nchi yako inaelekea wapi? Usije ukashangaa sana kama meli hiyo itakuwa inaelekea ufukoni kunako miamba ya hatari. Kama abiria mwema, jukumu lako ni nini?

HONGERA CHUO KIKUU CHA DAR ES SALAAM KWA KUWA MOJA YA VYUO VIKUU BORA BARANI AFRIKA !!!

2012-01-17T08:05:00.001+03:00

Pamoja na changamoto zote zinazokikabili, Chuo Kikuu cha Dar es Salaam kimetamba barani Afrika kwa kushika nafasi ya 36 kwa ubora katika ripoti iliyoandaliwa na shirika lisilo la kiserikali la URAP. Kiulimwengu kimeshika nafasi ya 1593.

Vyuo vikuu vingine vya Tanzania vilivyotajwa katika ripoti hiyo ni Muhimbili (42 barani Afrika, 1,716 kiulimwengu) na Sokoinne (45 barani Afrika, 1,771 kiulimwengu). Chuo Kikuu cha Capetown nchini Afrika Kusini ndicho kimeshika nafasi ya kwanza barani Afrika na kama kawaida Chuo Kikuu cha Harvard nchini Marekani kimeshika nafasi ya kwanza kiulimwengu.

Vigezo vilivyotumika pamoja na na habari za ziada kuhusu ripoti hii vinapatikana HAPA. Habari hii pia iliripotiwa katika gazeti la Daily News la tarehe 8/1/2012 HAPA.

DR. WILBROAD SLAA, KWA HILI UMECHEMSHA

2012-01-16T19:55:00.001+03:00

Na Ulanga Ally

Wanabidii (16/1/2012)

Natanguliza pole kwa familia na wanamageuzi kwa msiba wa mpiganaji mwenzetu Bi. Regia Mtema. Hakika msiba huu nipigo kubwa kwa Taifa. Tunamuomba Mwenyezi Mungu amuweke mahali pema peponi,amina.

Dr. Slaa ukiwa kiongozi mwenye sura ya kitaifa, utambue kuwa maisha yako yote yanakuwa mikononi mwa jamii (watanzania).Hii na maana ya kwamba kwa lolote utakalo shughulika nalo lazima litaifikia jamii na kupata fursa ya kulitafakari. Tunatambua kuwa kila mtu anatabia zake binafsi aidha kutokana na malezi, mafundisho ama kuzaliwa. Ni dhahiri pamoja na yote kuna tabia zisizokubalika (mbaya) na zinazokubalika (nzuri) katika jamii.

Tunatambua uligombea nafasi kubwa ya uongozi wa juu wa Taifa letu (U- Rais) na kwa bahati nzuri ama mbaya ulishindwa na Rais akapatikana naye ni Ndugu Jakaya Mrisho Kikwete.

Tutambue kuwa kulingana na sheria zetu pamoja na Katiba tuliyo nayo huyu ndiye kiongozi wetu Watanzania na ndio maana kila mtu akimtaja anaanza na "Rais". Katika ushindani kuna kushinda na kushindwa na inapokuwa shida kupinga ushindi wa mtu ki-ushahidi na kimazingira ni busara kukubali kushindwa.

Hivi vitu kwako vimekuwa ni vigumu kuvikubali na katika hali ya kawaida umeonekana ni mtu mwenye chuki kubwa tena ya wazi kwa Rais wa nchi. Binafsi mwenendo wa tabia yako siupendi kwani umejaaa unafiki,wivu,chuki na majungu ambapo haipaswi kwa kiongozi wa Kitaifa kama wewe na zaidi mtu wa imani (Padri Mstaafu) kuwa nayo.

Tunatambua kuwa Kikwete kama Rais na kama binafsi ana mapungufu yake lakini hawezi kuwa mbaya kwa yote. Sidhani kwamba imefikia hatua tunajali ya KIJINGA na kuacha MEMA.Kitendo chako cha kumuona Rais wa Nchi kama adui yako namba moja kiasi cha kutosalimiana (nitafafanua chini) hata katika shughuli za kijamii ni aibu kwa taifa, kwako binafsi, kwa kiongozi wako Mbowe na Chama kwa ujumla. Sikuwa na waza juu ya muendelezo wa tabia yako lakini sasa nimebaini kuwa wewe si muungwana na haufai kuwa kiongozi wa Taifa hili kama hutobadilika. Mifano:-

1) Ulipinga matokeo ya uchaguzi kupitia vyombo vya habari kwamba si halali na hii ni kwa sababu hukushinda. (Watanzania tulikusikia na kukuona).

2) Ulikataa kuhudhuria katika mwaliko wa kumtangaza Kiongozi aliyeshinda U-Rais huku na wewe ukiwa mgombea. (Watanzania tulikusikia).

3) Mchakato wa Katiba hukushiriki kwenda kumuona Rais Ikulu huku ukiwa kiongozi na mratibu Mkuu wa Chama kwa nafasi yako ya Ukatibu Mkuu. (Watanzania tunajua).

4) Umekataa kuhudhuria Sherehe zote za Kitaifa hasa pindi chama kinapoalikwa na kukuteua wewe kuhudhuria.

5) Kumkwepa Rais wa Nchi katika Msiba wa kipenzi chetu Bi. Regia Mtema (Hili limenisikitisha kuliko yote) huku ukiwa na taarifa ya ujio wake na baadae kuwasili baada ya kusikia Rais ameondoka. (tunajua waweza sema kuwa ulikuwa na majukumu mengine).

Picha, Maelezo na Maoni HAPA na HAPA

Hizi tabia zako hazipaswi kuvumilika hata kidogo na ni zaidi ya unyama. Wewe kama Kiongozi unayejiamini ni kwa nini ujifiche ama umkimbie mtu unayemuona kama adui yako? (unapaswa ukabiliane nae) tabia hii inaonyesha mengi huwa unaidanganya jamii juu yake sasa ni AIBU kuonana nae uso kwa uso. Tambua maisha yako na ya viongozi wengine wa vyama vya kisiasa ndani ya Nchi hii yako mikononi mwa Watanzania na si kwao binafsi. Hivi kama ni kuku -assassinate unafikiri TISS wanashindwa? Ukweli ni kwamba wanaweza lakini watawaambia nini Watanzania juu ya kifo chako. Hii nimeisema kama unahisi kuonana na Kikwete ata katika MSIBA maisha yako yatakuwa hatarini.

Tunajua by implication wewe ni mfuasi wa vegeance policy hasa utakapo pata madaraka (U-rais) , lakini sidhani kusalimia na mtu kutakupunguza hasira na malengo yako ya kutochukua maamuzi unayoyapenda.

Regia Mtema (Marehemu) -Ametukutanisha hapa msibani kwa sababu ya uungwana wake kwa watu wote pasipo kujali itikadi ya vyama ama dini. Huyu alikuwa binti mdogo sana lakini kwa miaka 32 (umri wake) ameweza kufanya makubwa na kusababisha sote kumpenda. Regia angekuwa mbaguzi, mwenye chuki, asiyekubali kubadilika leo hii pamoja na msiba wake , lakini maneno mengi ya chini chini yangekuwa yakipita juu ya ubaya wake.

Dr. Slaa tunakuthamini kwa mchango wako wa mageuzi ya kisiasa, changamoto pamoja na umri wako (miaka 64 tarehe 29/10/2012 utatimiza). Hivi kweli kujitenga kwako ama kwa tabia hizi unatufundisha nini sisi vijana tunaokuwa na tegemeo la Taifa?

Nampongeza sana Mwenyekiti wa Chama Mhe. Freeman Aikaeli Mbowe hakika ni tofauti kabisa na wewe. Yote ambayo umekwepa kuyatekeleza ata amabayo yamekuwa yakikuhusu , yeye ameweza kuyatekeleza napengine si kwa nafasi yake bali kwa kujali utu na kutambua kuwa SIASA SI VITA (pale demokrasia inapochukua mkondo wake). Chama Cha Demokrasia na Maendeleo kimepata kiongozi bora na mtu wa watu. Mhe. Freeman Mbowe hakika:-

1) Ni mpenda watu

2) Hana Makuu, majungu wala fitina

3) Ni binadamu wa kweli anayeishi kulingana na mwenendo wa maisha ulivyo.

4) Kiongozi bora wa Kisiasa na Kijamii

5) Hana visasi na mwenye kutambua utu wa mtu

6) Muungwana na si mgumu wa kusamehe

7) Mwenye msimamo thabiti wenye kujali haki za wananchi na Wajibu wa Watawala

8) Mtu wa kujichanganya na wengine pasipo kujali cheo chake, madaraka yake na pesa zake. “Ewe Mwenyezi Mungu tunakuomba umzidishie Umri pamoja na Busara Kiongozi huyu.”

WITO

Dr. Slaa tunajua ni jinsi gani ilivyo ngumu kubadili tabia yako hasa katika utu uzima ulio nao,lakini hakuna kinachoshindikana mbele ya Mungu. Rudi nyuma utubu na Mwenyezi Mungu atakupa busara ya kutuongoza vinginevyo "Your leadership can be another disaster to our Nation".

MWANGUA MAEMBE ANAPOJIKENGEUSHA NA KUSHINDWA KULENGA SHABAHA (UCHESHI)

2012-01-16T14:52:00.000+03:00

Naitazama katuni hii kama kejeli dhidi ya binadamu. Tunayo tabia ya kushindwa kuhangaikia mambo ya muhimu katika maisha yetu na badala yake tunaongozwa na hisia, hulka na hata tamaa katika kusaka vitu ambavyo wala havitusaidii sana.

Huyu baba badala ya kukazania kutungua haya maembe ili agange njaa aliyonayo yeye analengesha fikra zake na umakinifu kwingineko na matokeo yake analeta madhara mengine ambayo hayakutegemewa.

Lakini pengine haya ndiyo maisha ati! Kuna njia au mtindo mmoja tu wa kuyaishi?

UTAFITI: ETI KUANGALIA TV KWA SAA MOJA KUNAPUNGUZA DAKIKA 22 ZA MAISHA YAKO !!!

2012-01-16T07:34:00.000+03:00

Ukifuata kila linalosemwa na wanasayansi utashindwa kuishi. Leo watasema kunywa kahawa kunapunguza msongo wa mawazo. Kesho watasema kunywa kahawa huko huko kunaongeza shinikizo la damu na uwezekano wa kupata pigo la kiharusi. Leo watasema hiki na kesho watasema kile ali mradi ni vurugu tupu. Kibaya zaidi ni ukimya wao kuhusu nini cha kufanya hasa pale tafiti zao zinapotoa matokeo yanayokinzana.

Kwa vile nyingi ya tafiti hizi hufanyika huko Ulaya na Marekani, Waafrika inabidi kuyapokea matokeo ya tafiti hizi kwa uangalifu sana kwani huwa hayazingatii mazingira yetu na mtindo wetu wa maisha (japo sasa tunajitahidi sana kuwaiga kwa kila kitu).

Utafiti uliofanywa mwaka jana na wanasayansi wa Chuo Kikuu cha Queenesland unaonyesha kwamba kuangalia runinga kwa watu wenye umri wa miaka 25 na kuendelea kuna madhara makubwa kiafya na kunapunguza muda wa kuishi. Utafiti huu unaonyesha kwamba kwa kila saa moja unayoitumia ukiangalia runinga basi unajipunguzia dakika 22 katika maisha yako. Hii ni sawa na kuvuta sigara mbili.

Wanasayansi hawa wanasema kwamba tatizo hasa siyo kuangalia tv bali madhara ya kukaa mahali pamoja kwa muda mrefu ambako kunasababisha magonjwa ya moyo, kisukari, kunenepeana na matatizo mengine ya kiafya yanayosababishwa na mtindo wa maisha ya kubweteka (sedentary lifestyle). Kufanya mazoezi, hata kama ni dakika 15 tu kwa siku ni jambo la muhimu na kumeonyeshwa kuwa na faida nyingi za kiafya ikiwemo kuongeza siku tatu katika maisha yako.

Ati, kwetu sisi Waafrika, kuna ukweli wo wote katika utafiti huu? Utafiti huu unapatikana HAPA.

FIKRA YA IJUMAA: TUSIKATE TAMAA, HATA IWEJE !!!

2012-01-13T06:40:00.001+03:00

HERI YA MWAKA MPYA (2012) WADAU. TUSONGE MBELE !

2012-01-01T02:04:00.004+03:00

KATI YA HAWA KUNA RAIS WETU MWAKA 2015 !!!

2011-12-31T04:45:00.000+03:00

...Wanasiasa vijana wanaotajwa ni pamoja na Waziri wa Maliasili na Utalii, Ezekiel Maige, Waziri wa Nishati na Madini, William Ngeleja, Waziri wa Habari, Vijana, Utamaduni na Michezo, Dk Emmanuel Nchimbi, Naibu Waziri wa Viwanda na Biashara, Lazaro Nyalandu, Mbunge wa Bumbuli, January Makamba na Katibu wa Itikadi na Uenezi wa chama hicho, Nape Nnauye.

Katika kundi la umri wa kati wapo Rais wa Zanzibar, Dk Ali Mohamed Shein, Waziri Mkuu Mstaafu Frederick Sumaye, Waziri wa Ujenzi, Dk John Magufuli, Waziri wa Mambo ya Nje na Ushirikiano wa Kimataifa, Bernard Membe, Waziri wa Maji, Profesa Mark Mwandosya, Waziri Mkuu aliyejiuzulu na Mbunge wa Monduli, Edward Lowassa na Naibu Katibu Mkuu wa Umoja wa Mataifa, Dk Asha-Rose Migiro.

Kundi hilo pia linawajumuisha Waziri wa Nchi, Ofisi ya Rais (Utawala Bora), Mathias Chikawe, Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi, Waziri wa Ulinzi na Jeshi la Kujenga Taifa, Dk Hussein Mwinyi, Waziri wa Mambo ya Ndani ya Nchi, Shamsi Vuai Nahodha na Naibu Waziri wa Ujenzi, Dk Harrison Mwakyembe.

Katika kundi la wenye umri zaidi ya miaka 60 wanaotajwa ni pamoja na Waziri wa Nchi, Ofisi ya Rais (Uhusiano na Uratibu), Stephen Wassira na Waziri wa Ushirikiano wa Afrika Mashariki, Samuel Sitta.....

Chanzo: Mwananchi

FIKRA YA IJUMAA: KARMA (TENDA WEMA NA USIENDE ZAKO ???)

2011-12-30T07:38:00.002+03:00

Wakati mwingine umsaidiaye ndiye mwokozi wako, tena wa papo kwa papo. Hebu soma tukio hili fupi kwa makini kama una muda.
**************

Bwana Victor Giesbrecht (61) na mkewe Ann walikuwa safarini kutoka Winnipeg Canada kwenda katika jimbo la Indiana nchini Marekani. Walipokuwa wanapita katika jimbo la Wisconsin, waliona gari lililokuwa limepata pancha kando ya barabara. Wanawake wawili (Sara Berg na Lisa Meie) walikuwa nje ya gari lililokuwa limepata pancha huku wakiwa hawajui la kufanya. Bwana Victor ndiye alikuwa anaendesha; na kutokana na wema na ubinadamu wake aliamua kuacha safari na kwenda kuwasaidia wale wanawake kubadilisha tairi.

Baada ya kufanikiwa kubadilisha tairi, Bwana Victor na mkewe waliendelea na safari yao. Waliendesha kidogo tu na ghafla Bwana Victor alipatwa na mshtuko wa moyo na kupoteza fahamu. Mkewe alipatwa na kiwewe, na baada ya kupiga simu ya dharura (911) alibakia akihangaika tu akiwa hajui cha kufanya.

Kwa bahati nzuri wakati akihangaika, wanawake wawili walifika na mmoja alikuwa ni nesi na anayefahamu vyema kupambana na dharura za kiafya kama hii ya mshtuko wa moyo. Mara moja mwanamke yule alianza kumpa huduma ya kwanza Bwana Victor kwa kumpulizia pumzi kinywani na kuminya kifua chake ili kujaribu “kuufufua” moyo wake uliokuwa umezimika.

Aliendelea kufanya hivyo mpaka wataalamu wa mambo ya dharura walipofika. Bwana Victor alichukuliwa kwenda hospitalini ambako alikaa kwa wiki moja na baadaye kuruhusiwa kuondoka. Yule mwanamke aliyempa matibabu ya dharura katika zile dakika za mwanzo kabla ya wataalamu wenyewe kufika ndiye alikuwa ameokoa maisha ya Victor kwa kuzuia moyo wake “usife” kabisa.

Cha ajabu ni kwamba mwanamke huyu shujaa mwokozi alikuwa ni Sarah Berg - mwanamke yule yule ambaye dakika chache tu huko nyuma alikuwa amepata pancha na Victor akamsaidia kubadilisha tairi lake. Baada ya mambo kutulia na wahusika wote kutambua lililokuwa limetokea kila mmoja alimshukuru mwenzake kwa wema aliokuwa amemtendea.

Bwana Victor akiwa hospitalini

Tukio hili limeacha gumzo kubwa huku wengine wakisema ni muujiza na wengine wakisema ni kanuni ya Karma tu inafanya kazi: Kila tendo tulitendalo hapa duniani hutuathiri kwa namna moja ama nyingine – jema kwa wema, na baya kwa ubaya. Na wakati mwingine athari zenyewe zinaweza kuwa za papo kwa papo kama ilivyotokea kwa Victor.

Matendo kama haya ni ya kutia moyo sana na yanauonyesha ubinadamu wa binadamu kwa uangavu wa kutosha hata katika kipindi hiki ambapo binadamu analaumiwa kuwa ameupoteza ubinadamu wake na kutawaiwa na ubinafsi na uchoyo. Ndiyo maana hata mimi sijausahau wema niliofanyiwa na mzee mmoja mwenye kibaraghashia na kandambili za bluu miaka 18 iliyopita nilipokuwa nimelazwa katika hospitali ya Muhimbili.

Kisa hiki chenye mafunzo tele kinapatikana HAPA. Unaweza kutazama video ya kisa hiki HAPA. Unaweza pia kusoma kipengele cha UBINADAMU katika blogu yangu HAPA.

****************
Wikiendi njema wadau.

Hebu basi kutenda wema na likawe
azimio letu mojawapo katika
mwaka mpya ujao (2012) !!!

****************

HILI NALO NENO: ETI UFAULU WA KISWAHILI UMESHUKA ZAIDI UKILINGANISHWA NA ULE WA KIINGEREZA KWA WATAHINIWA WA DARASA LA SABA.

2011-12-29T12:40:00.012+03:00

Ni wazi kwamba Kiingereaza kimeshatushinda, lakini je, hata Kiswahili nacho kinakaribia kutushinda? Lugha ya kufundishia ni nguzo muhimu katika mfumo wo wote ule wa elimu na kusema kweli bila kuwa na sera thabiti ya lugha ya kufundishia, elimu hugeuka na kuwa kama mchezo tu. Ni lini tutafanya marekebisho yanayotakiwa na kuhitajika sana katika sera yetu ya lugha ya kufundishia?

***********

Ni Aibu kwa Wanafunzi wa Tanzania Kufeli Kiswahili

(Ijumaa, 23/12/ 2011)

HIVI karibuni tumesikia kuwa ufaulu katika somo la Kiswahili kwa matokeo ya darasa la saba mwaka huu, umeshuka ukilinganisha na ufaulu wa somo Kiingereza.

Hali hiyo inaweza kuwashangaza watu wengi waliopo nchini kwa wanafunzi kushindwa kumudu lugha yao ya taifa.

Hasa kwakuwa inafahamika wazi kuwa Kiswahili ndiyo lugha inayotumika kama lugha ya mawasiliano kwa mwanafunzi kwa ngazi ya shule ya msingi kwa kipindi chote cha masomo kwa miaka saba, wakati Kiingereza kinafundishwa kama somo tu.

Kwa kiasi kikubwa, Watanzania wanaweza kuzungumza Kiswahili fasaha, lakini akiingia darasani kufanyia mtihani anaweza kufeli vibaya hata ukimshindanisha na mtu ambaye ni lugha yake ya tatu au ya kujifunza.

Waswahili husema “mdhaarau mwiba mguu huota tende, hayo ndiyo tunayoyaona sasa katika kiwango cha ufaulu katika somo la Kiswahili. Lakini katika ngazi ya elimu ya msingi na shule za upili Kiswahili hutumika, ili kukidhi mahitaji ya mwanafunzi katika kumjenga ili kuwa na msingi mzuri katika kufahamu vyema lugha yake.

Tukiwa tunatafakari katika matokeo hayo, yapo mambo kadhaa yanayopaswa kutazamwa na kuchukuliwa hatua ili kuepuka fedheha kwa wanafunzi kufeli somo hilo.

Hata hivyo kwa upande wa wanafunzi wa ngazi za juu ya elimu ya chuo kikuu na vyuo huwa, na rejesta zao mojawapo ni kukiona Kiswahili kuwa kigumu.

Hata hivyo usemi huo unaweza ukawa na athari chanya iwapo watu watachukua hatua kukabiliana na changamoto hiyo kwa kubaini ugumu kwake uko wapi na kushirikiana na wenzake katika kupitia mada zinazomsumbua ama asizozielewa vyema kwa msaada zaidi, ikiwa ni pamoja na kupitia maandiko mbalimbali ya wataalamu wa Kiswahili ndani na nje ya Tanzania.

Vilevile wanafunzi wa shule za msingi wanapaswa kazingatia masomo na kwa kupunguza michezo na soga pamoja na mambo yasiyo na tija pamoja na kutafuta muda wa ziada kujisomea kwa bidii ili kuyatafutia ufumbuzi yale ambayo hayakueleweka vyema wakati wa vipindi vya darasani.

Upande wa walimu wanapaswa kuendelea kufundisha somo la Kiswahili kitaaluma zaidi kuliko kufundisha kwa mazoea na kurahisisha mbinu za kufundishia kwa wanafunzi hao.

Ushirikiano huo wa walimu na wanafunzi ukiwa thabiti na kila mtu akatekeleza majukumu yake, hakuna sababu ya mwanafunzi kufeli somo la Kiswahili katika ngazi zote.

Hii ni kutokana na mambo mengi yanayoelezwa katika lugha hiyo yanahusu mazingira yaliyo karibu na mwanafunzi. Hata hadithi zinazoelezewa na watunzi wa vitabu ni kutoka mazingira hayo ambapo makabila ya Watanzania ni wazungumzaji wakubwa wa lugha ya Kiswahili.

Kwa upande wa mwenendo wa kuendelea kushuka kwa ufaulu wa mwanafunzi nchini si jambo la kuachwa kwani hiyo inadhihirisha kwamba jamii ya Watanzania hawafahamu mambo mengi katika lugha yao licha ya kuzungumza kila wakati.

Kwa hali hiyo ningetegemea kuona somo la Kiswahili linakuwa la kwanza katika ufaulu wa masomo mengine licha ya kuwa masomo mengine nayo yanafundishwa kwa lugha ya Kiswahili kwa ngazi zote kinakofundishwa.

Ipo haja ya kubaini chanzo cha wanafunzi hao kutofanya vyema katika somo hilo ikiwa ni njia ya kuelekea kupata ufumbuzi wa moja kwa moja. Lakini chanzo moja wapo ni wanafunzi kutofahamu sarufi ya lugha yao ya Kiswahili. Kwani sarufi katika lugha yoyote ndiyo uti wa mgongo wa lugha hiyo.

Kuwa na walimu wenye uzalendo na waliopikwa katika kufundisha somo la Kiswahili hilo, watumike ipasavyo katika maeneo yenye uhaba na si mwalimu yeyote anayezungumza lugha hiyo apewe nafasi ya kufundisha Kiswahili. Hilo linaweza kuwa na tija katika kuleta maendeleo ya kuinua kiwango cha ufaulu kwa wanafunzi wa shule za msingi na sekondari.

Jambo lingine la kuzingatia ni kuimarisha kwa kiwango cha zana za kufundishia. Huku baadhi ya walimu wamekuwa hawazingatii hilo kwa wa kwa kuona kuwa ni kupoteza muda na gharama, wakati hata zipo njia mbalimbali za kuunda zana hizo bila gharama yeyote.

Aidha katika kukabiliana na changamoto hiyo ya kuendelea kushuka kwa kiwango cha Kiswahili, pia walimu wa Kiswahili kwa umoja wao wanapaswa kuliangalia katika umoja wao walimu wa Kiswahili kwa ngazi mbalimbali.

Tunapojiandaa kuingia mwaka mpya, natumaini wanafunzi wataendelea kujizatiti ili kuhakikisha kuwa wanafanya vyema katika mitihani yao ya Kiswahili kwa mwaka unaokuja.

Walimu ambao ndiyo walezi wakuu wa wanafunzi hao, nao wanapaswa kuangalia njia nzuri za kuondokana na aibu hii ya kila mwaka kuendelea kushuka kwa ufaulu wa somo la Kiswahili.

Njia pekee ni kuwa na mipango endelevu inayoakisi maendeleo ya Kiswahili katika kukikuza na kukieneza.

Baraza la Kiswahili nchini kwa kushirikiana na taasisi za lugha ya Kiswahili nchini nalo linapaswa kutoa mchango wake kwa wanafunzi na wananchi kwa ujumla ili kukifikisha Kiswahili katika hadhi na kukitangaza nje ya Tanzania.

Mathalani, kuwapo na ushirikiano baina ya walimu wa Kiswahili na watendaji wa Baraza la Kiswahili la Taifa, kutaleta tija katika kusukuma gurudumu la maendeleo nchini.

Chanzo: Mwananchi

VITUKO VYA WALIMWENGU: JAMAA APORA BENKI NA KURUDI BAA KUMALIZIA BIA ALIYOKUWA AMEIAGIZA

2011-12-29T05:39:00.004+03:00

Huyu mwizi (kwa jina John Robin Whittle, 52) ametoa mpya. Alianza kwa kuingia kwenye baa na kuagiza bia. Baada ya kunywa kidogo alitoka na kwenda kupora benki iliyokuwa karibu. Baada ya kufanikisha uporaji wake, jamaa alirudi kwenye baa ile ile kumalizia bia yake. Wanywaji wenzake walishangaa baadaye walipoona polisi wanavamia baa hiyo na kumtia jamaa mbaroni.

Kisa hiki kimeleta gumzo kubwa kwa watu huku wengine wakidai kwamba mwizi huyu alijilengesha kwa polisi makusudi na kwamba alikuwa anataka kukamatwa. Wengine wanasema kwamba jamaa ni mwizi mzoefu na pengine alikuwa amejiamini kupita kiasi.

Miye huvutiwa na vituko vya aina hii kwa sababu kupitia kwayo tunaweza angalau kupata fununu kidogo kuhusu uasili na undani hasa wa huyu mnyama machachari ajiitaye “Homo Sapiens”

Kituko hiki kimetokea kule Tampa katika jimbo la Florida nchini Marekani.

MAISHA YA KUMBUKONI - WAKUMBUKE WAZAZI (NA KILIMAMBOGO BROTHERS)

2011-12-28T12:37:00.002+03:00

Nyakati zile kulikuwa na jamaa mmoja pale kijijini kwetu mwenye baisikeli iliyoandikwa "Kaminomino Mpenda Wasichana. Uliza Sababu Yake". Huyu jamaa alikuwa mashuhuri sana na ndiye pekee alikuwa na redio yenye uwezo wa kucheza kanda za kaseti. Ndipo nilipozisikia nyimbo hizi za Kakai Kilonzo na Kilimambogo Brothers kwa mara ya kwanza.

Nashangaa kwamba hata baada ya miaka zaidi ya 20, ujumbe katika nyimbo hizi ungali hai mno. Ni kosa kubwa kukimbilia mijini au huku nje na kuwasahau wazazi waliotulea na kutusomesha hasa kwa sisi tuliotoka vijijini. Tuwakumbuke wazazi !!!

MKATE WA USHOGA NDIO HUO UNAPAKWA "BLUE BAND." WAAFRIKA TUTAWEZA KUUEPUKA ?

2011-12-28T07:42:00.001+03:00

Inaonekana mabwana wakubwa hawa hawajaridhika na utumwa wa kiuchumi, kifikra, kisaikolojia na kitamaduni waliouanzisha wakati wa biashara ya utumwa, kuupalilia wakati wa ukoloni na kuuendeleza kupitia ukoloni mamboleo hadi leo.

Hawajaridhika:

Pamoja na ukweli kwamba bado tunaendesha mifumo yetu ya elimu kwa kutumia lugha zao – lugha ambazo wala hatuzielewi vizuri; na hivyo kufanya elimu tuwapayo vijana wetu kuwa kichekesho.

Pamoja na ukweli kwamba tungali tunadhani kuwa kila kitu chao ni bora kuliko cha kwetu.

Pamoja na ukweli kwamba tungali tunaiga kila kitu wanachofanya: wakitembea uchi nasi tunaiga, wakilegeza suruali zao nasi tunalegeza, wakitoboa masikio na kusuka nyweli nasi tunafanya vivyo hivyo.

Pamoja na ukweli kwamba tumezungukwa na utandawazi wao kila kona.

Sasa wanatulazimisha kuhalalisha ushoga – jambo ambalo naamini katika makabila mengi ya Kiafrika (lilikuwa) linafanyika kwa siri ingawa sasa, kutokana na utandawazi tumeanza kuona “maanti” wakijitokeza waziwazi.

“Blue Band” hii inayopakwa kwenye huu mkate wa ushoga ni nini? Ni Donge nono la misaada ambalo, kama makinda ya ndege yasiyojiweza, tumezoea kumegewa pamoja na ukweli kwamba Mungu Ametujalia kila kitu; na sehemu kubwa ya donge hili huishia katika midomo mipana ya wachache.

Serikali ya Uingereza imeweka wazi kwamba haitatoa misaada yake kwa nchi ambazo hazikubaliani na ushoga. Serikali ya Marekani pia imetoa masharti kama hayo.

Kutokana na mikwara hii, serikali ya Malawi ilibidi kulegeza kamba kuhusu msimamo wake kwa sababu asilimia kubwa ya bajeti yake inategemea misaada kutoka Uingereza na Marekani. Hata Uganda imeonyesha dalili za kutetereka katika msimamo wake kuhusu suala hili.

Ni nchi chache za Afrika zinazoweza kujiendesha bila “Blue Band” hii ya wakubwa na tusije kushangaa huko mbele tukisikia washika kurunzi wetu wameshatia sahihi mikataba ya kuukubali ushoga – hata kama majukwaani wanajipiga kifua na kulaani. Msimamo wa sasa wa Tanzania kuhusu suala hili ni wa kutia moyo sana. Natumaini kwamba hautabadilika; na hata ukibadilika basi usiwe ni kutokana na kulazimishwa na hawa wakubwa.

Bila kujali maoni na msimamo wangu kuhusu ushoga, kinachonikera mimi ni kulazimishwa kukubaliana na matakwa ya hawa wakubwa wetu. Utumwa haukutosha? Ukoloni haukutosha? Ukoloni mamboleo je? Pamoja na yote haya, mpaka tukubali ushoga kweli ndo tupate misaada? Ni lini tutaweza kusimama tisti na kuendesha mambo yetu bila kutegemea mikate hii iliyopakwa "Blue Band" yenye sumu ???

FIKRA YA IJUMAA: HIVI NI KWA NINI KILA KIONGOZI HUDHANI KUWA ANAPENDWA SANA NA WATU WAKE ?

2011-12-23T07:45:00.008+03:00

"Wananipenda. Watakufa ili kunilinda. Watu wangu!"

Muammar Gaddafi (1942 - 2011)

Tumewaona. Wapo. Walikuwepo na Watakuwepo. Tena wamejaa tele katika jalala la Historia.

Hata muda wao wa kutawala ukiisha, utawaona wakihangaika kujaribu kubadili katiba za nchi zao ili waendelee kutawala. Utawasikia wakijigamba:

"Ninapendwa mno! Watu wangu bado wananihitaji. Siwezi kuiacha nchi yangu"

"Macho man" wa Urusi. Naye Anadai Anapendwa Sana!

Hata upepo wa mabadiliko unapoanza kuvuma, kama vile mazuzu, watawala hawa wapendwa waliojaa kiburi, dharau, ubilionea na ulevi wa madaraka hushindwa kujitafakari, kujisaili na kusoma alama za nyakati. Na matokeo yake daima huwa ni ya kusikitisha. Wengi wao huishia "kugadafishwa" na wengine hujikuta katika shimo la takataka la Historia kinyume na matarajio yao.

"Simba" wa Syria. Pia anadai anapendwa sana!

Kama kuna jambo ambalo hunifurahisha na kunifanya nijisikie vizuri na hata kunifanya nijimwambafai kama Mtanzania ni utaratibu wetu tuliojiwekea wa kubadilishana madaraka kwa njia za amani kila baada ya miaka 10 - tena bila kujali kama wanapendwa ama la. Natumaini kwamba tutauendeleza utaratibu huu. Mwalimu Nyerere alishatuonyesha njia.

Mungu Ibariki Tanzania !!!

JAMANI EEH: HAYA MAGAMBA YENYE "SUPA GLUU" MWISHOWE YATAIDHOOFISHA AFYA YA NYOKA WETU.

2011-12-22T08:00:00.002+03:00

Ni kweli amekosekana mkereketwa jasiri mshika korombo akayabobonyoa haya magamba sugu kwa nguvu? Kubembelezana mpaka lini wakati nyoka wetu anazidi kudhoofika? Kipi ni cha muhimu zaidi: magamba yaliyochoka na kumaliza muda wake au afya ya nyoka wetu? Aiiii !!!

Katuni hii ni kutoka kwa Said Michael.

WANAFUNZI HEBU SOMENI UTAFITI HUU: ETI KUTAFUNA BAZOKA DAKIKA TANO KABLA YA MTIHANI HUONGEZA KIWANGO CHA UFAULU.

2011-12-21T08:08:00.000+03:00

Tafiti mbalimbali zimeonyesha kwamba kutafuna bazoka (gamu/bigiji/chingamu/ubani wa kutafuna) kuna faida katika kuimarisha afya ya kinywa na hata jitihada za kupunguza uzito wa mwili na msongo wa mawazo. Utafiti mpya uliochapishwa katika jarida la kitaaluma la Appetite unaonyesha kwamba kutafuna bazoka dakika tano kabla ya mtihani kunawasaidia wanafunzi kufanya vizuri zaidi katika mitihani yao kuliko wenzao ambao hawakufanya hivyo.

Utafiti huu unaonyesha kwamba kutafuna bazoka kunachangamsha na kusisimua ubongo na kufanya wanafunzi wakumbuke vitu vizuri na kwa urahisi; na hivyo kuweza kufanya vizuri katika mitihani yao.

Utafiti huu pia unaonyesha kwamba kutafuta bazoka wakati wa mtihani wenyewe kunaweza kuingiliana na shughuli za ubongo za kufikiri na kukumbuka mambo na hivyo kuwafanya wanafunzi kufanya vibaya katika mitihani yao.

Wanasayansi hawa pia wanaonya kwamba wanafunzi wasitegemee kutafuna bazoka dakika tano kabla ya mitihani yao ili kufaulu. Wanabainisha wazi kwamba kutafuna bazoka kunasisimua tu kumbukumbu na mambo ambayo mwanafunzi tayari ameshajifunza, kujisomea na kuyahifadhi ubongoni mwake. Kama wanataka kufaulu mitihani yao, wanafunzi ni lazima wajisomee na kujiandaa vizuri kwa ajili ya mitihani yao.

Vidokezo vizuri kuhusu jinsi ya kujiandaa kufanya mitihani vinapatikana HAPA. Habari za utafiti huu zimedokezwa HAPA.

HILI NALO NENO: ETI BABU WA LOLIONDO KUFIKISHWA MAHAKAMANI KWA UTAPELI

2011-12-20T17:15:00.005+03:00

Eti babu wa Loliondo anafunguliwa kesi za jinai na madai. Anafunguliwa kesi ya jinai kwa kosa la kujipatia fedha kwa njia ya udanganyifu na kwamba eti aliwahadaa watu kwamba dawa yake inatibu wakati hakuna mtumiaji aliyepona.

Pia anafunguliwa kesi ya madai ili aweze kulipa fidia za watu waliopoteza maisha na wote waliosafiri kutoka sehemu mbalimbali huku wakitumia gharama kubwa ili kupata dawa isiyotibu.

Lakini je:

Vipi kuhusu mawaziri na vigogo wa serikali waliokuwa wakimiminika Loliondo huku wakiifagilia dawa hiyo kwamba ilikuwa imewasaidia na hivyo kuendelea kuchochea moto wa tiba hiyo? Hawahusiki kwa namna yo yote na "utapeli" huu?

Vipi kuhusu ripoti ya "wataalamu" iliyosema kwamba kikombe cha babu kilikuwa ni tiba bomba? Vipi kuhusu wagonjwa waliokuwa wakisimama na kuitetea dawa hiyo kwamba ilikuwa inatibu? Vipi kuhusu watoa vikombe wengine waliokuwa wamechipuka sehemu mbalimbali nchini? Nao watashtakiwa?

Maswali ya kujiuliza katika suala hili ni mengi na yote yanaonyesha jinsi tunavyoendesha mambo yetu kama jamii. Hatuko makini, hakuna uwajibikaji na mambo yetu mengi - hata yale ya muhimu kabisa - tunayafanya kimzahamzaha tu. Kama anavyosema mhusika mmoja katika vibonzo vya Pogo, adui wa maendeleo yetu si mwingine bali ni sisi wenyewe!

Jikumbushe habari mbalimbali kuhusu Babu wa Loliondo na "tiba" yake ya kimiujiza HAPA.

MANENO YA BUSARA KUTOKA KWA MWANDISHI MASHUHURI ERNEST HEMINGWAY

2011-12-20T11:44:00.002+03:00

Haya ni maneno ya busara; na haijalishi kama Ernest Hemingway mwenyewe aliishia kujiua kwa kujipiga risasi. Maisha!

UTAFITI: MAPENZI YA KUTUMIA MIDOMO SASA CHANZO KIKUU CHA KANSA ZA KINYWA, KICHWA NA SHINGO.

2011-12-20T08:26:00.007+03:00

Binadamu ni kiumbe wa ajabu sana; na ukichunguza vizuri matatizo yake mengi ni ya kujiletea tu. Hebu jaribu kufikiria: ni magonjwa mangapi ambayo anajisababishia mwenyewe? Tazama vita anavyopigana, tazama anavyoua wanyama wengine – na wakati mwingine ni kwa lengo la kujifurahisha tu! Tazama anavyoharibu mazingira. Tazama anavyoweza kuiba na kujilimbikizia mali na kuwaacha wenzake walio wengi wakiteseka. Akili, weledi, ulafi, uchoyo na uhasama vimemzidi. Tazama!

Akili na weledi huu wa binadamu umeingia hata katika tendo la kujamiiana, tendo ambalo kwa wanyama wengine limelengwa hasa katika kuhakikisha kuwa kizazi kipya kinazalishwa na maisha yanaendelea. Kwa binadamu, tendo hili limegeuka kuwa starehe naye anajaribu kila njia – potelea mbali hata kama ni kinyume na maumbile! Matokeo yake ni kujiletea matatizo.

Katika utafiti mpya, wanasayansi wanaonyesha kwamba mapenzi ya kulambana na kunyonyana sasa yanasababisha asilimia 64 ya kansa zote za kinywa, shingo na kichwa. Wanasayansi hawa wanaonyesha kwamba mtu ambaye amefanya mapenzi haya ya kulambana na kunyonyana na watu sita au zaidi katika maisha yake ana uwezekano wa kupata kansa za kinywa mara nane zaidi akilinganishwa na mtu ambaye hajawahi kufanya mapenzi ya aina hii.

Mbali na tumbaku, kansa nyingi za kinywa husababishwa na kirusi cha Genital humanpapillomavirus (HPV) ambacho huenezwa hasa kupitia mapenzi ya kulambana na kunyonyana.

Japo utafiti huu umefanyika nchini Marekani, mimi nadhani ni suala la muda tu kabla nasi hatujakumbwa na masaibu haya hasa kutokana na tabia yetu ya kuigaiga mambo kizembe na wakati mwingine hata kuwazidi hata hao tunaojaribu kuwaiga. Tuwe makini.

Kwa habari zaidi kuhusu kirusi cha HPV na jinsi ya kujikinga nacho soma HAPA. Habari kuhusu utafiti huu zinapatikana HAPA.

WANABLOGU WENZANGU NA WAPENZI WOTE WA KWELI WA BLOGU HII: SASA NIMERUDI RASMI !!!

2011-12-19T19:05:00.001+03:00

Wapendwa wanablogu wenzangu na wapendwa wote wa blogu hii.

Kwanza nianze kwa kuwaomba msamaha kwa kupotea bila kuaga. Wakati mwingine misukosuko ya maisha, kama vile dhoruba isiyo na soni wala utashi, hutuvamia na kututupa huku na huko mithili ya tiara iliyokatikiwa kamba au mtumbwi hafifu katikati ya dhoruba ya karne! Wasimamao tisti na kupigana kiume (kike?) hubakia na "viburi" vyao na tabasamu la ushindi baada ya dhoruba na misukosuko hii ya maisha. Nami nimepita dhorubani humo, nimeyaona niliyoyaona na kujifunza niliyojifunza, na kama vile chuma kilichopita tanuruni - kikafuliwa na kung'arishwa mithili ya kioo, nimetoka salama. Maisha ni lazima yaendelee ati - tena kwa ari zaidi, nguvu zaidi na kasi zaidi. Maisha !!!

Na kwa tangazo hili napenda kuwaataarifu rasmi kwamba sasa nimerudi na kuanzia sasa mambo yatakuwa motomoto katika blogu hii. Na jicho na sikio langu sikivu sasa vitaonekana tena katika blogu zenu pendwa - kama kawaida vikiona na kudodosa yanayotokea huko. Tuko pamoja daima !!!

Natumaini mambo yanaendelea vyema huko mliko. Hebu mwaka huu na ukaishe kwa amani na salama; na sote tukaweze kuuona mwaka mpya wa 2012 ingawa sina uhakika sana kama kuna faida yo yote ya kufanya hivyo. Maisha !!!

VITA VYA IRAQ VIMEMALIZIKA: WAMAREKANI WAMEPATA FAIDA GANI?

2011-12-19T07:48:00.002+03:00

Batalioni ya mwisho ya jeshi la Marekani ikiingia nchini Kuwait

Jana Batalioni ya mwisho ya wanajeshi wa Marekani ilivuka mpaka na kuingia nchini Kuwait. Hii ilikuwa ni ishara ya mwisho kwamba vita vya Wamarekani nchini Iraq vilikuwa vimemalizika rasmi na rais Obama ametimiza mojawapo ya ahadi zake kuu alizozitoa wakati wa kampeni.

Swali linaloulizwa na watu wengi ni hili: Wamarekani wamepata faida gani katika vita hivi vilivyodumu kwa takriban miaka tisa? Katika vita hivi:

Wamarekani hawakupokelewa kwa mbwembwe, nderemo na vifijo kama walivyodhani na matokeo yake wamepoteza wanajeshi 4,487 na majeruhi zaidi ya 30,000

Wairaq zaidi ya 100,000 wameuawa.

Wamarekani wametumia kiasi kikubwa cha pesa (pengine zaidi ya dola trilioni moja ukijumlisha na gharama za matibabu ya wanajeshi wanaorudi kutoka vitani). Pesa hizi ni za kukopa na zimechangia katika kuongeza na kukuza naksi ya bajeti na hivyo kusababisha uchumi wa Marekani kuyumba.

Wamarekani bado hawajaweza kuyapata mafuta ambayo watu wengi wanadhani kwamba ndilo lilikuwa hasa lengo la vita hivi.

Wamefanikiwa kumuua Saddam Hussein na watoto wake na hivyo wamefanikiwa “kuikomboa” Iraq kutoka mikononi mwa dikteta na kuifanya kuwa nchi ya kidemokrasia. Matumaini ya Rais Bush yalikuwa kwamba kuanguka kwa Saddam kungewasha moto wa mabadiliko katika nchi za Kiarabu. Hili halikutimia na kwa bahati nzuri moto wa mabadiliko ukawashwa na machinga wa Tunisia aliyeamua kujichoma moto baada ya kuchoshwa na unyanyasaji wa vyombo vya dola.

Ngoja tuone kama Wairaq wataweza kusimama kidete na kama hiyo demokrasia waliyopandikiziwa itadumu!

HUYU MWANAFUNZI ANAJITAFUTIA MATATIZO HUYU...

2011-12-01T08:24:00.001+03:00

KUJIVUA MAGAMBA: MKAKATI RAHISI NA MUHIMU LAKINI MGUMU KUTEKELEZEKA. KWA NINI ???

2011-11-30T20:20:00.001+03:00

Mwanzoni ilisemwa, tena kwa vishindo na mihemko tele, kwamba mkakati kabambe wa kujivua magamba ili kuisafisha CCM ungekamilika katika muda wa siku tisini. Muda huo ukaja na kuyoyoma.

Baadaye lugha ikageuka na kusemekana kwamba kujivua magamba ilikuwa ni mkakati wa hiari na wa polepole.

Kwa wachambuzi wengi ilikuwa bayana kwamba mkakati huu rahisi na muhimu kwa uhai wa chama hiki kikongwe ama ulikuwa haukuandaliwa vizuri au utekelezaji wake ulikuwa umekwama na kugubikwa na ubabaishaji.

Wapo wanaouona mkakati huu kama ni kosa na mtego kwa CCM hasa kutokana na ukweli kwamba badala ya kukiunganisha chama, umegeuka na kuwa chanzo cha migogoro na mgawanyiko wa kimakundi.

Ndiyo maana nimefurahi kusikia kwamba sasa dawa ya mafisadi imeiva ndani ya CCM na hakuna cha msalie mtume; na kwamba mafisadi ni lazima wang'oke mara moja vinginevyo nguvu zitatumika ili kuwang'oa!

Swali wanalopaswa kujiuliza wanaoitakia mema CCM ni hili: Kwa nini utekelezaji wa mkakati huu umekuwa mgumu? Kwa nini ni vigumu kwa wanasiasa wetu hawa kujivua magamba? Wanaogopa nini? Ni kweli sasa nguvu zitatumika katika kukisafisha chama?

Katuni zote ni kutoka kwa Said Michael.

"Mazoea" Yana Shida Ati !!!

2011-11-09T18:09:00.000+03:00

Nguvu za Umma (na Mabeberu) Hazishindiki: Kama Unabisha Nenda Kamuulize Marehemu Gaddafi !!!

2011-10-20T18:50:00.007+03:00

Hebu fikiria

Umetawala kwa miaka 42. Umefanya mema na mabaya na kwa hivyo wapo wanaokuona kuwa ni shujaa na wapo wanaokuona kuwa ni nondo mla watu. Wananchi wenzio wamekuchoka na wanataka mabadiliko. Mabeberu wa nje nao wanataka mafuta ya nchi yako. Watu wako wanaanza kuandamana kukupinga na kudai mabadiliko. Na badala ya kutumia ubinadamu na njia za amani, unaanza kuwaua wananchi wako mwenyewe. Hili linageuka kuwa kosa kubwa kabisa kuliko yote uliyowahi kutenda. Mwishowe mapinduzi yanashika kasi na wananchi wako pamoja na mabeberu wa nje wanashinda. Unaishia kuuawa na maiti yako kuburuzwa barabarani kama mnyama. Sasa endelea....

*********************

Japo siyo ubinadamu wala ustaarabu kushabikia kifo cha binadamu mwingine kwani hiyo ndiyo njia yetu sote tuliozaliwa, ukaidi, ujinga na kulewa madaraka kunakoonyeshwa na baadhi ya watawala kama akina Gaddafi kunashangaza. Watu unaowaongoza wanapochoka na kufikia hatua ya kuchukua silaha dhidi yako, ni wakati mzuri wa kusikiliza matakwa yao na kuachia ngazi.

Japo Historia inaonyesha wazi tena na tena kwamba nguvu za umma kamwe hazishindiki, watawala wetu hawa vichwamaji, kama vile mbuni, huishia kuficha vichwa vyao mchangani na kuufumbia macho matakwa na mateso ya umma. Wakiwa katika kunguku la umungu-mtu, ubilionea na madaraka yasiyo na kikomo, vichwangumu hawa hushindwa kabisa kuuona ukweli ulio wazi kwamba kamwe huwezi kumdanganya na kumtawala binadamu kwa wakati wote. Matokeo yake ndiyo haya - wanaishia kuuawa na mizoga yao kuburutwa mabarabarani kama vile wanyama. Inasikitisha sana na sijui kama viongozi na mafisadi wa Afrika wanajifunza lolote!!!

Fuatilia habari mbalimbali zinazozidi kumiminika kuhusu kuuawa kwa Gaddhafi HAPA. Pumzika salama Kanali Muammar Gaddafi. !!!

Ati, Tungali Tunahitaji Kiranja? Kama Jibu ni Ndiyo, Tumpate Wapi Kiranja Mpya ?

2011-10-17T18:14:00.000+03:00

Katuni hii inapatikana HAPA

Tunapomkumbuka Mwalimu Nyerere Tujiulize: NI NANI HASA ALIKUWA MFUASI WA KWELI WA ITIKADI ZAKE ???

2011-10-14T23:15:00.000+03:00

Makala hii niliiandika zamani na ilichapishwa katika gazeti mfu la Kwanza Jamii la tarehe 20/10/2009. Sijui kama bado makala hii ina ukweli wo wote leo lakini si vibaya tukiirejelea tena kwani, kama kawaida ya siku hii ya kumbukumbu ya Mwalimu, mwenge umewashwa, hotuba zimetolewa na tathmini mbalimbali zimefanyika. Pamoja na mafungufu yake yote, kwangu mimi Mwalimu Nyerere atabakia kuwa kiongozi wa pekee Tanzania na Afrika nzima hasa kutokana na uadilifu wake!

*************************
Makala haya yametoka katika gazeti la Kwanza Jamii la leo - 20/10/2009

Mwalimu Nyerere na Jangwa Lake la Kiitikadi

(Ati, ni Nani Hasa Alikuwa Mfuasi wa Itikadi ya Mwalimu?)

Na Dkt. Masangu Matondo Nzuzullima

Katika diwani ya Karibu Ndani (Euphrase Kezilahabi, DUP, 1988:27) kuna shairi liitwalo “Azimio”. Beti chache za shairi hilo zinasema hivi:

Azimio sasa ni

Mabaki ya chakula

Kwenye sharubu za bepari

Kalamu inayovuja

Katika mfuko wa mwanafunzi

Vumbi zito

Baada ya ng’ombe kupita

Kilichosalia sasa

Ni punje za ulezi

Zilizosambazwa jangwani

Na mpandaji kipofu

Hivi ndivyo Kezilahabi – ajulikanaye pia kama Shaaban Robert wa Pili – alivyoliona Azimio la Arusha mwaka 1988. Nimelikumbuka shairi hili wakati nikitafakari Historia ya nchi yangu

Tanzania

hasa katika kipindi hiki ambapo nchi hii nzuri inaadhimisha miaka 10 tangu muasisi wake atoweke hapa duniani. Ni kweli Mwalimu alisambaza ulezi wake wa Ujamaa na Kujitegemea jangwani? Kama ni kweli, ina maana Mwalimu hakuwa na mfuasi wa kweli hata mmoja katika genge lake la Makomredi waliokuwa wakiimba ahadi za usawa wa binadamu? Ati, ni nani hasa alikuwa mfuasi wa kweli wa itikadi kombozi za Mwalimu Nyerere?

Msukumo hasa wa kuandika makala hii fupi niliupata kutokana na visa vifananavyo vilivyotokea kwangu mwenyewe na dada Subi Sabato wa nukta77.blogspot.com. Katika kuadhimisha miaka 10 ya kifo cha Mwalimu Nyerere niliweka mkusanyiko wa video 17 za Mwalimu Nyerere katika blogu yangu (http://matondo.blogspot.com/2009/10/video-mbalimbali-za-mwalimu-nyerere.html). Subi Sabato pia alifanya hivyo hivyo katika blogu yake. Haukupita muda mrefu nilipata barua kutoka kwa watu waliokuwa wakijiita watumishi wa serikali wakinitaka niziondoe video za Mwalimu Nyerere katika blogu yangu mara moja kwani eti sikuwa na hati miliki na kwa hivyo nilikuwa navunja sheria. Waliendelea kunitisha kwamba nisipofanya hivyo basi sheria kali zingechukuliwa dhidi yangu. Subi Sabato naye alipata vitisho kama hivyo. Jambo hili lilinishangaza sana na nilijiuliza maswali mengi ambayo mpaka leo sijapata majibu na ndiyo maana naandika makala hii. Ina maana kuna mtu anamiliki hotuba za Mwalimu Nyerere? Niliwauliza watishaji wangu wanieleze aliko mmiliki wa hati miliki wa hotuba hizi ili niweze kuwasiliana naye lakini mpaka leo sijapata jibu. Mimi nilikuwa ninadhani kwamba hotuba za Mwalimu ni hazina ya taifa na Watanzania wote tuna haki ya kuzisikiliza bila kutishwa na mtu. Nilichukulia mfano wa hapa Marekani ambapo sheria za hati miliki ni kali sana lakini hotuba nyingi za marais wao ziko mtandaoni na ukienda katika maktaba za maraisi hao utaweza kuzisikiliza bure. Ni hazina ya taifa lao. Ni

mali

ya wote. Ni kumbukumbu ya historia ya nchi yao. Hotuba hizi hazimilikiwi na mtu! Hata hotuba nyingi za Rais Obama tayari zipo mtandaoni! Kuna tovuti nyingi zenye hotuba hizi na mojawapo nzuri ni hii hapa.

Mpaka nitakapopata ufafanuzi wa kina kuhusu ni nani hasa mmiliki wa hotuba za Mwalimu Nyerere, ninashawishika kuamini kwamba kuna kundi la watu ambao wanakerwa, kutishwa na kukoseshwa amani na hotuba za Mwalimu kwani wamegeuka kuwa wasaliti. Hawa inawezekana walikuwa ni watu wa karibu sana kwa Mwalimu na walijifanya kuwa “ardhi yenye rutuba” kwa mawazo na itikadi zake kumbe kwa ndani walikuwa ni “majangwa” tu yasiyootesha wala kustawisha cho chote. Ni mbwa mwitu waliokuwa wamevaa mavazi bandia ya “ukomredi” huku wakiimba na kudumisha “fikra sahihi za Mwalimu” kikasuku tu huku kimatendo wakiwa wamekakawana jangwani. Na baada ya Mwalimu kuondoka sasa wanajaribu kila wawezalo kufanya mawazo yake kombozi yasiwafikie Watanzania huku wakitumaini kwamba kwa njia hii hatimaye pengine Mwalimu ataweza kusahaulika.

Katika hotuba zake nyingi unaweza kumsikia Mwalimu akikemea rushwa na ufisadi; na utulivu wake wa akili, falsafa komavu na uwezo wa kuona mbali, kuonya na kutabiri mambo unaonekana waziwazi. Anasema waziwazi kabisa kwamba rushwa ikiachwa iendelee itaweza siku moja kuutikisa “msingi” wa nyumba (

Tanzania

). Mwalimu, pamoja na mapungufu yake yote, alitambua kwamba rushwa na utajiri wa kupindukia wa watu wachache kwa upande mmoja, na umasikini na uhohehahe wa asilimia 100 kwa walio wengi kwa upande mwingine siku moja utaitikisa Tanzania kwani ipo siku hawa wasio na kitu watachoka na kusema “liwalo na liwe”. Na hili likitokea hakuna jeshi litakaloweza kurekebisha mambo. Watu wakiamua wameamua na Historia imejaa mifano tele inayoonyesha kwamba nguvu za umma ni kama sunami. Badala ya kujaribu kurekebisha mambo na kuchukua ushauri wa Mwalimu kama vile mbuni asiye na upeo, kundi hili la “wanajangwa” inaonekana limeamua kuficha kichwa mchangani likiamini kwamba kutokomeza mawazo ya Mwalimu pengine ndiyo njia ya mkato ya kuendeleza “jangwa” lao wanalojaribu sana kuhakikisha kwamba linabakia kuwa jangwa. Kundi hili kwa hakika linajidanganya!

Hali hii inaibua hoja nyingine. Kutokana na “ujangwa” huu ambao sasa unaonekana waziwazi, haishangazi kuona kwamba sera nyingi za Mwalimu zilishindwa na kusema kweli inashangaza kidogo kuona kwamba baadhi ya sera zake zilifanikiwa mf. Elimu.

Historia inatuambia kwamba viongozi wengi waliofanikiwa ni wale ambao walikuwa na wafuasi wa kweli, wafuasi ambao walikuwa tayari hata kupoteza maisha yao ili kulinda na kutetea itikadi na harakati zilizoanzishwa na viongozi wao. Na hapa sizungumzii madikteta waliolazimisha itikadi zao kwa wafuasi wao kwa mkono wa chuma na kumwaga damu. Mara nyingi Historia huwa haina huruma na watu wa aina hii bali kuwatupa katika shimo lake la takataka. Huko ndiko waliko akina Mobutu Sese Seko Kuku Ngbendu wa Zabanga, Jenerali Bokasa, Jenerali Field Marshal Idd Amin Dada na wengineo wa aina hiyo.

Viongozi ambao hawakupanda mbegu zao katika “jangwa” mara nyingi hawakuwa hata na haja ya kuandika mawazo yao. Wafuasi wao wa kweli walifanya hivyo. Yesu Kristo hakuandika kitabu cho chote lakini wafuasi wake wa kweli walifanya hivyo. Buddha pia hakuandika kitabu cho chote. Wafuasi wake wa kweli walifanya hivyo. Lao-Tzu (mwanzilishi wa Taoism) pia hakuandika kitabu cho chote. Wafuasi wake wa kweli walifanya hivyo. Ferdinand de Saussure – mwanaisimu wa Uswisi ambaye anatambuliwa kama baba wa Isimu ya kisasa hakuandika kitabu cho chote pia wakati wa uhai wake. Wanafunzi wake walikusanya “notisi” na mihadhara yake aliyokuwa akiitoa wakati wa uhai wake na kuandika kitabu ambacho kilibadilisha kabisa mkondo mzima wa taaluma ya Isimu. Historia ina mifano mingi ya watu wa aina hii. Ni vigumu mno kwa kiongozi kufanikiwa kama amezungukwa na “jangwa” kama inavyobainika sasa kwa Mwalimu Nyerere.

Mwalimu Nyerere ataendelea kuenziwa na Watanzania, Waafrika na wapenda amani kokote duniani na juhudi za kundi hili linalojaribu kuzima mawazo yake linapoteza muda wake bure. Pamoja na makosa yake yote na kushindwa kwa sera yake ya msingi ya Ujamaa na Kujitegemea Watanzania wanaendelea kumuenzi na kumheshimu kiongozi huyu kwa msimamo wake na kutotetereka katika kutekeleza kile alichokiamini kwamba kilikuwa na maslahi kwa watu wake. Mwalimu Nyerere alihubiri na kutenda alichokihubiri na karibu kila kitu alichokitenda kilikuwa ni kitu ambacho aliamini kabisa kwamba kilikuwa ni kwa maslahi ya taifa lake changa. Jambo hili linawavutia sana Watanzania hasa wakiangalia maisha yake ya uadilifu aliyoishi – yeye pamoja na familia yake. Ni kwa sababu hii mimi naamini kwamba Nyerere na itikadi yake vitadumu!

Pamoja na “ujangwa” uliopo, wakati sasa umefika wa kumaliza ukiritimba katika hotuba (na vitu vingine ambavyo ni hadhina ya taifa letu). Hotuba za Mwalimu Nyerere siyo

mali

ya Redio

Tanzania

, mtu wala shirika au kikundi cha watu bali ni

mali

yetu sote. Ni wakati sasa wa kuziweka hotuba hizi katika mtandao. Hebu tuwe na tovuti maalumu yenye hotuba zote za viongozi wetu wote kuanzia Mwalimu Nyerere, Rais Mwinyi, Rais Mkapa na rais wetu wa sasa Rais Kikwete. Tovuti hiyo itangazwe na itunzwe vizuri kwani itakuwa mojawapo ya hazina muhimu sana kwetu kama Taifa kwa wakati huu na vizazi vijavyo. Wiki ijayo nitazungumzia kosa kubwa kuliko yote la Mwalimu Nyerere!

Niandikie: profesamatondo@gmail.com

Nisome: matondo.blogspot.com

MSIKILIZE MAREHEMU NG'WANAKANUNDO HAPA CHINI - MANJU MASHUHURI WA KISUKUMA KUTOKA MWANZA

2011-10-01T06:35:00.001+03:00

Mimi ni mkereketwa wa masuala ya kitamaduni hususan lugha zetu za kienyeji ambazo leo hii tumetokea kuzidharau na kuziona kuwa hazina maana wala nafasi hasa katika ulimwengu huu wa "kisasa" . Kumbe kwa kufanya hivyo tunazidi kujididimiza, kujidharau na kuendelea kujitwanisha kwa tamaduni za wenzetu.

Tunajipoteza sisi wenyewe na tunapoteza nafasi nzuri sana ya kuweza kuwaelimisha watu wetu hasa katika masuala na kampeni mbalimbali za muhimu kijamii. Kwa wanaofahamu Kisukuma, hebu msikilizeni huyu Manju anavyoonya kwa ufasaha kuhusu gonjwa hatari la UKIMWI na umuhimu wa kupanda mazao yanayohimili ukame kama mtama na mihogo kama mkakati wa kujikinga na balaa la njaa. Mbona tusitumie lugha zetu za kienyeji katika kampeni za kijamii kama hizi za UKIMWI, magonjwa kama kipindupindu, malaria na mengineyo? Kuna ubaya gani?

UJUMBE MZURI KUHUSU GONJWA LA UKIMWI KUTOKA KWAYA YA MUUNGANO MWANZA

2011-09-09T14:01:00.006+03:00

UBORA WA UANDISHI WA HABARI WA TANZANIA HAURIDHISHI !!!

2011-09-09T08:51:00.002+03:00

Japo Tanzania ni nchi yenye uhuru mkubwa wa habari, mimi nadhani uhuru huu hautumiwi vizuri na ubora wa habari tunazoshindiliwa kila siku hauridhishi. Kwa mfano, ni magazeti machache sana yanayoandika habari za kweli na zilizofanyiwa uchunguzi wa kina, habari zilizojaa ushahidi, data na hoja hakikifu yakinifu.

Magazeti mengi - hata yale yanayojidai kuwa ni dhati pevu - yamejikita katika kuandika habari zilizofanyiwa uchambuzi nusunusu, habari ambazo japo kwa juu zinaonekana kama za kweli, ukisoma kwa uangalifu utakuta kwamba ama lojiki na hata data zilizotumiwa katika kufanyia majumuisho ya habari hizo hazikubaliki. Matokeo yake habari nyingi zinaandikwa kwa kuripuliwa na zinaonekana kuwa kama za udakudaku tu; na zilizojaa mihemko inayotokana na ushabiki wa kisiasa uliokithiri.

Kwa vile udaku ndiyo unaopendwa sana na wasomaji, inawezekana pengine magazeti mengi yanafanya hivi ili yaweze kuvutia wasomaji. Mkanganyiko unazidi zaidi kwa sababu wanajamii wengi bado wanaamini kwamba kila kinachotiwa katika maandishi, kusikika kwenye redio au runinga basi ni lazima kiwe cha ukweli.

Matokeo yake tunakuwa na jamii inayoshabikia mambo bila kuyaelewa sawasawa, jamii iliyojikita katika kuamini udaku na inayoweza kuyumbishwa kirahisi. Ndiyo maana ni rahisi sana kumchafulia mtu jina kama ukitaka. Kama una "bifu" na Matondo na akatokea kuwa na nafasi kubwa katika jamii, basi jidamke na kusema kuwa Matondo ni fisadi na akaunti yake aliyoficha Marekani ina mamilioni ya dola. Na kesho yake utakuta habari hii imetapakaa katika kurasa za mbele za magazeti - hata yale yanayojidai kuwa makini.

Hakuna gazeti ambalo litakaa chini na kujaribu kutafuta ukweli na kuthibitisha chanzo na uhalali wa habari kama hii. Na kwa vile jamii nayo bado inaamini (na hata kutegemea) kwamba kila kitu kinachoandikwa katika magazeti ni cha ukweli basi kuanzia siku hiyo mlengwa wa habari hizi atajulikana kama fisadi, gamba n.k. Na kama hana ujasiri wa kusimama na kujitetea kama alivyofanya Sumaye hapa chini basi jamii daima itamtazama kwa jicho la hatihati.

Lengo langu hapa siyo kuwatetea mafisadi na nadhani msimamo wangu kuhusu UFISADI na mambo mengine katika jamii unaeleweka kwa wasomaji wa blogu hii. Ninachokisema hapa ni kwamba, kama jamii ni lazima tuwe makini na habari nusunusu tunazolishwa na vyombo vyetu hivi vya habari. Na litakuwa jambo jema kama tutaweza kuzitambua habari za kidaku kama wenzetu hawa na kuzipa uzito wake unaostahili.

Waandishi wa habari, mnalo jukumu kubwa sana katika ukombozi wa jamii yetu na kabisa msijaribu kuliteteresha jukumu hili zito. Kama tulivyoona katika uchaguzi mkuu uliopita, mabadiliko mema yanatokea katika nchi yetu na nyakati zinabadilika. Isaidieni jamii katika juhudi za kujitafuta kwake. Shirikini vyema katika kuhakikisha kwamba tunakuwa na jamii makinifu na yenye uwezo wa kuhoji ukweli wa mambo na siyo kushabikia udaku kiholela - jamii ambayo ikidanganywa au kupewa habari au ahadi za kidaku, basi iwe na uwezo wa kusimama na kusema hapa mmetudanganya; na mkiendelea kutudanganya basi tutawanyang'anya madaraka tuliyowapa!

Nilishawahi pia kulieleza dukuduku hili HAPA.

ATI, TATIZO LA UMEME LITAMALIZIKA LINI ???

2011-09-08T21:27:00.000+03:00

ATI, "UTALII" NDIYO MAFANIKIO (PEKEE) YA J.K. KWA WATANZANIA ???

2011-09-01T00:06:00.001+03:00

Katuni hii ya Said Michael imenifikirisha pamoja na ukweli kwamba pengine imedhamiriwa itazamwe kama kejeli au tashtiti (satire) tu. J.K. ameshaandamwa sana kuhusu safari zake za mara kwa mara na mjadala mkali uliowahi kurindima kuhusu suala hili ni ule ulioanzishwa na Profesa Mbele.

Japo sijakisoma kitabu cha Wasifu wa Kisiasa wa J.K na kuona yanayosemwa humo, leo mtu angekuuliza utaje mafanikio na urithi wa J.K. kwa Watanzania ungetaja vitu gani mbali na "utalii" kama katuni hii inavyokejeli?

TUMETHUBUTU, TUMEWEZA (KUJIVUA MAGAMBA) NA SASA TUNASONGA MBELE !!!

2011-08-31T16:44:00.005+03:00

Hii kauli mbiu ya CCM kule Igunga kwa Rostam Aziz imenivutia. Ina maana ile operesheni ya kujivua magamba imeshakamilika? Kama jibu ni ndiyo basi hili ni jambo jema kwa WanaCCM na bila shaka uchaguzi wa Igunga utakuwa pimajoto mojawapo kuona jinsi operesheni hii ilivyopokelewa na wananchi. Tunaomba tu uchaguzi huu mdogo wa Igunga usikumbwe na kashfa zozote za uchakachuaji wa kura na badala yake uwe huru, wa haki na amani!

FIKRA YA IJUMAA: ETI WAJINGA NDIYO WANAJIAMINI !!!

2011-08-26T05:57:00.005+03:00

Jamani, wenye maarifa na washika kurunzi wetu mashujaa mko wapi? Mbona mmejaa shaka? Ni nini kilichowafanya mpoteze kujiamini kwenu? Kwa nini mmewaachia wajinga waipalilie mimea japo mwajua wazi kwamba si wataalamu wa kilimo? Mnaridhia kweli ngalawa izame nanyi mpo mwakodoa macho tu? Kwa nini???

Bofya hapa kusoma wasifu wa Mwanafalsafa na Msomi Bertrand Russell. Wikiendi njema wadau!

ATI, MIHADHARA HII CHOCHEZI INA LENGO GANI HASA ???

2011-08-23T05:18:00.006+03:00

Picha hii iko HAPA

Leo wakati natafuta nyimbo za Rose Muhando na Bahati Bukuku katika Youtube, nimekutana na mambo ya ajabu. Watu wameamua kuweka "mihadhara" yenye kutetea dini ya Kiislamu kwa kutumia majina ya waimbaji mashuhuri wa injili kama Rose Muhando, Bahati Bukuku na wengineo (mf. tazama HAPA).

Video ina jina la Rose Muhando lakini ukibofya unapelekwa kwenye video inayoonyesha mihadhara ya kitoto kati ya Uislamu na Ukristo - mihadhara ambayo lengo lake hasa mimi huwa silielewi japo kuna kipindi ilikuwa imejikita sana kule nyumbani. Kwa kawaida katika mijadala hii Ukristo huwa unashambuliwa sana, Biblia hupotoshwa na kutafsriwa nje ya mandhari na muktadha wake; na Uislamu hushadidiwa kuwa ndiyo dini ya kweli na mwanzilishi wake kuwa ndiye hasa mtume wa mwisho aliyefunga kazi. Daima mwamba ngoma huvutia kwake ati!

Hata hivyo ukisikiliza na kufuatilia vizuri mijadala hii ni wazi kwamba hoja nyingi zinazotolewa zimeegemea katika mihemko, hazina nguvu, zimejaa jazba, hazina umakinifu na hazijachujwa vizuri. Unaweza hata kupata fununu kuhusu kiwango cha elimu-dunia cha watoa mihadhara hawa na wasikilizaji wao ambao wengi wao kazi yao kubwa ni kushangilia tu!

Sina ugomvi na Waislamu na mtume wao wala dini zingine na waanzilishi wao kwani naamini kwamba ni uhuru wa kila mtu kuamini dini yo yote anayotaka. Hata hivyo huwa nakerwa na watu wanaosimama kidete na kuanza kushambulia dini zingine hata ikibidi kwa kutumia matusi (ya kitashtiti) na udogoshaji. Historia inaonyesha kwamba mashambulizi ya aina hii mara nyingi yana madhara makubwa kijamii hasa upande mmoja unapokuwa hauna subira na uvumilivu. Ndiyo maana tukaonywa kwamba kama unaishi katika nyumba yenye vioo basi kamwe usishabikie mchezo wa kurusha mawe. Dini !!!

Ati, Ukristo ndiyo dini ya kweli? Uislamu ndiyo dini ya kweli? Uhindu je? Dini zingine nazo? Vipi kuhusu dini zetu za Kiafrika tulizokuwa nazo kabla ya ujio wa Waarabu na Wazungu katika mwambao wa Afrika Mashariki? Kwa kuwa dini hizi tumezichanganya na dini tulizoletewa, je hizi nazo ni za kweli?

Ukiona jamii inaanza kubetuana kwa kutumia misingi ya udini, basi jua kwamba jamii hiyo inacheza na moto na inakoelekea si kwema! Na watu wanaoendekeza na kushabikia haya mambo ya udini (wakiwemo hawa watoa mihadhara uchwara) ni watu wa kuogopwa kama ukoma. Mwenye masikio na asikie !!!

FIKRA YA IJUMAA: HIVI LENGO HASA LA ELIMU TUNAYOIPATA VYUONI NI NINI ???

2011-08-19T08:05:00.001+03:00

Nimejiuliza swali hili baada ya kuona orodha ya shahada 20 ambazo eti hazina faida hapa Marekani. Inawezekana kweli shahada ikawa haina faida kwa "msomi" aliyeipata? Tunaupimaje umuhimu wa elimu tunayoipata? Ni uwezo na uwezekano wake wa kutupatia ajira nzuri baada ya masomo au ni ule umuhimu wa elimu kama nyenzo kombozi inayomkaramsha aipataye na kumwondolea woga wa kupambana na mazingira yake? Ati, katika jamii yetu, elimu tunayowapatia vijana wetu ina lengo gani hasa?

MKANGANYIKO WA OPERESHENI YA KUJIVUA MAGAMBA

2011-08-19T04:58:00.001+03:00

Bofya HAPA na HAPA ili kujikumbusha mambo ya msingi kuhusu operesheni hii ambayo mimi nadhani haijaeleweka vizuri. Katuni hii ni kutoka kwa Mwanaharakati Said Michael.

UJUMBE WA LEO: WEWE NDIWE !!!

2011-08-14T11:30:00.003+03:00

Kwa hili nakubaliana kabisa na Dr. Seuss. Kuishi kwa kujaribu kuwafurashisha watu wengine ni kazi bure. Mbali na ukweli kwamba jambo hili haliwezekani lakini pia mara nyingi watu hawa unaojaribu kuwafurahisha hata si watu wa muhimu kwako na kusema kweli hawajali. Ati, wawezaje kumfurahisha binadamu mwenzako ambaye mwenyewe hana furaha?

Wewe ndiwe na hakuna mwingine kama wewe hapa duniani. Itupilie mbali hofu na kawe na furaha Jumapili hii njema.

BI ARUSI ANAPOSHIKWA NA UCHUNGU WA KUJIFUNGUA KANISANI, TENA KANISA LA KIKATOLIKI !!!

2011-08-14T09:06:00.001+03:00

Wakatoliki ni wahafidhina (conservatives) katika mambo mengi hasa yanayohusu mapenzi, ndoa na uzazi. Bado hawajaruhusu waumini wao kutumia kondomu, wanapinga mambo ya kupanga uzazi na kabisa kabisa hawaruhusu ngono kabla ya ndoa. Ndiyo maana kasheshe hii ya Bi. Arusi kushikwa na uchungu wa kujifungua kanisani imenishangaza kidogo. Ina maana tumbo la ujauzito lilikuwa halionekani? Au pengine Wakatoliki siku hizi wamelegeza masharti ili kwenda na mabadiliko katika jamii ya sasa ambapo watu kuishi pamoja kabla ya ndoa ni jambo la kawaida? Nawaombea wanandoa hawa ndoa njema pamoja na kasheshe hii iliyowapata!

****************

Bibi harusi ashikwa uchungu, ajifungua kanisani Muheza

Thursday, 11 August 2011 21:16

Mwandishi Wetu, Muheza

BIBI harusi aliyefahamika kwa jina la Mariam Shabani, ameshikwa na uchungu wa kujifungua kanisani wakati akifungishwa ndoa na mchumba wake, aliyefahamika kwa jina la Deo Massawe.Tukio hilo lilitokea juzi Kanisa Katoliki lililopo maeneo ya Majengo Shimoni, wilayani Muheza, huku umati wa watu ukiwa umejaa ndani ya kanisa hilo ukiisubiri kufungwa kwa ndoa hiyo.

Mwandishi wa habari hizi alishuhudia tukio hilo ndani ya kanisa hilo, wakati Padri Martin Kihiyo, akiendelea na misa ya kufungisha ndoa hiyo, ghafla bibi harusi akiwa amevaa vazi rasmi la harusi, alianza kupiga kelele akidai anasikia uchungu wa kujifungua.

Hata hivyo, baada ya bibi harusi huyo kupiga kelele, Padri Kihiyo alisitisha misa hiyo na Mariamu kuchukuliwa haraka na kuwekwa kwenye gari huku akiwa hajiwezi hadi Hospitali Teule Muheza.Pia, Mariamu anafahamika kwa jina la Sada Shabani, baada ya kufikishwa hospitali alipelekwa chumba cha kujifungulia huku akiwa na vazi lake la harusi.

Baada ya kuhudumiwa Mariamu, alijifungua mtoto wa kike na kulazwa wodi ya Azimio wanakolazwa wazazi.
Mmoja wa muuguzi hospitalini hapo aliyeomba asitajwe, alisema bibi harusi huyo alijifungua njiti akiwa na miezi saba.Kwa upande mwingine, kwenye ukumbi ambao ulikuwa umeandaliwa kwa sherehe ya harusi hiyo, watu walikuwa wamekaa ndani wakisubiri maharusi bila kufahamu kilichokuwa kikiendelea.

Hata hivyo, kutokana na hali hiyo bwana harusi alilazimika kufunga ndoa na msichana mwingine wa pembeni kwa niaba ya bibi harusi, ili kuhalalisha sherehe hiyo huku bibi harusi mwenyewe akiwa hospitali analea.

Inasemekana Mariamu alianza kusikia uchungu akiwa saluni na aliwaeleza baadhi ya watu, lakini walimjibu kuwa huo ni woga wa harusi.Katika hatua nyingine, mbuzi wa ndafu aliyekuwa ameandaliwa alianguka chini kwenye mchanga.

Baadhi ya Wakristo walisikitishwa na tabia ya viongozi wa dini kuendelea kuwafungisha ndoa watu ambao wake zao wana mimba kwamba, ni aibu.

Chanzo: Mwananchi

UCHESHI: MWANAMKE ALIYEWASHINDA WENZIO, WEWE UTAMUWEZA ???

2011-08-10T07:31:00.002+03:00

Wenyewe husema usivione vyaelea vimeundwa. Sisi tunapenda kubadilisha na kusema: Ukiona vyealea basi ujue vilishawashinda waundaji (na manahodha)! Kwa hekaheka wanazopambana nazo wanaume katika ndoa, soma HAPA

NENO LA LEO: NUKTA ZINAYOYOMA NA MUDA UNAKWENDA. UNAJUA KINACHOENDELEA ???

2011-08-09T11:58:00.003+03:00

Ndiyo maana Heraclitus - mwanafalsafa wa kale wa Ugiriki aliwahi kusema kwamba "huwezi kuogelea mara mbili katika mto ule ule". Lakini pia tukumbuke kwamba kila kitu ni tofauti ingawa hakuna kilichobadilika. Tutafakari!

AFRIKA: BARA LENYE UTAJIRI USIO NA WENYEWE....

2011-08-09T05:58:00.002+03:00

(1) Ni bara tajiri sana na lililonona kwa utajiri wa kila aina...

(2) Utajiri huo hata hivyo unafaidiwa na mabepari kutoka nje na mafisadi wachache wa ndani

(3) Mabepari wa nje wananenepeana na kuwaacha Waafrika wakiteseka na umasikini wa kutisha...

(4) Mama Afrika atateseka mpaka lini? Ni lini atajifungua watoto wenye uchungu na nia ya kweli ya kumkomboa? Ni lini utajiri wake utafaidiwa na watoto wote badala ya majibwa ya nje na mbweha wachache wa ndani?

HUYU MWANAMZIKI WA KIZAZI KIPYA KUTOKA UGANDA AMENISIKITISHA !!!

2011-08-08T01:31:00.003+03:00

Mwana-Fleva Aziz Azion kutoka Uganda

Kwa nini alikubali kutoa hotuba katika lugha asiyoifahamu (vyema)? Kwa nini asitumie lugha yake ya mama au mkalimani kama kulikuwa na ulazima wa kufanya hivyo? Au naye alitaka kuonekana "msomi" kwa kutema ung'eng'e hata kama umeparaganyika?

Suala la lugha bado ni tete katika nchi nyingi za Kiafrika na mpaka tutakapoweka mikakati ya kiukombozi na yenye kumakinikia utamaduni wetu, wengi wetu tutaendelea kuadhirika kama huyu msanii mchovu. Ni lazima tujifunze hizi lugha za kigeni lakini tusifikie hali ya kujidhalilisha na kuzidharau lugha zetu za Kiafrika - lugha zilitotukuza na kutuonyesha ulimwengu. Ningefurahi sana kama angetema Kiganda na kuwaacha watu wasiokifahamu wameduwaa. Pengine nao ingewabidi waende wakajifunze Kiganda. Utumwa wa fikra huu sijui utatuisha lini sisi Waafrika. Soma kisa chake hapa chini.

************

Msanii Uganda...Hajui Kiingereza Kabisaaaaaa ...!

Msanii Aziz Azion toka Uganda,aliumbuka alipokua analazimisha kuongea ung'eng'e wakati hajui wakati anatoa speech pande za Serena Hotel kwenye uzinduzi wa Jarida la Black Flavour aka Black Flavour Magazine

Aziz Azion alialikwa kama guest performer na MC alipomuomba atoe speech kidogo kuhusiana na jarida hilo, alikamata mic na kuanza kujiuma uma kidogo apate ugonjwa wa moyo coz aliongea broken english kabla ya kuhamia kwenye lugha yake ya taifa ya Luganda. Artist huyo alifunguka longtime kitambo kuwa ameanza English Course ili ajifunze ung'eng'e....Coz aliripotiwa kuwa hawezi kabisa kuongea lugha hiyo....

Chanzo: Chini ya Kapeti

*********************

Angalizo Zaidi

Hata hii lugha iliyotumiwa na huyu Chini ya Kapeti hapo juu nayo ni changamoto tupu....

KATIKA FAMILIA HII NA WATAKATIFU WAPO !!!

2011-08-07T05:32:00.003+03:00

AISEE - UNA AKILI KAMA ULIZALIWA NA Ph.D !!!

2011-08-06T15:09:00.001+03:00

Katuni hii ya Said Michael imenifanya nijiulize hili swali: Utendaji wa viongozi wetu wasomi wenye ma-Ph.D na maprofesa ukoje huko bungeni na serikalini hasa ukizingatia kwamba siku hizi kila Profesa na mwenye Ph.D anataka kuwa mbunge au waziri? Wanakwenda huko ili kutumia elimu yao ili kuiokoa jamii au wanafuata dili tu?

Wenyewe wanasema kwamba unaweza kutathmini uhai wa jamii na malengo ya mfumo wake wa elimu kwa kuangalia tabia na matendo ya wasomi wake. Ati, matendo ya wasomi wetu yanatuambia nini kuhusu mfumo wetu wa elimu - sisi tunaoishi katika nchi ya Ujamaa na Kujitegemea ambako binadamu wote ni sawa?

"SLIPINGI ALAWANSI" MJENGONI - HA HA HA !!!

2011-08-06T10:25:00.003+03:00

(1) Naibu Spika mwenyewe kautandika

(2) "Nambari wani eeh" naye kaucharaza

(3) Tyson anajitetea

(4) Mwananji wa Kiraracha naye hoi

(5) Tyson tena - kingunge wa kulala bungeni!

(6) Viti maalum hawa: Mmoja kautandika, mwingine anajinyonya kidole...

WIMBO MASHUHURI WA DINI KATIKA KISUKUMA - TULIBANG'WA YESU, TULIBANG'WANAMALIA, TULASHIKU NG'WIGULU !!!

2011-08-06T06:34:00.004+03:00

-Sisi ni Watoto wa Yesu. Sisi ni Watoto wa (Bikra) Maria. Tutafika Mbinguni.....

Wimbo huu unapatikana katika ukurasa wa mwisho wa kitabu hiki. Sijui nitawezaje kuwasiliana na wenye hati miliki kwani kuna mambo mengi kuhusu imani na utamaduni wa Wasukuma ambayo ningependa kuyaweka hapa - ikiwemo ile hadithi mashuhuri ya Shing'weng'we na Masalakulangwa.

FIKRA YA IJUMAA: ATI, KITU GANI NI CHA MUHIMU ZAIDI KWAKO HAPA DUNIANI ???

2011-08-05T19:13:00.006+03:00

Ni kazi yako? Ni Nyumba yako nzuri? Ni Mkeo, mumeo au mpenzi wako? Ni ngono? Ni msosi? Ni ufisadi wako? Ni familia? Ni dini yako? Ni madaraka yako? Ni marafiki? Ni gari lako la bei mbaya? Ni elimu yako?, Ni kifo? Ni utajiri wako? Ni nini basi?

Fikiri vizuri halafu utoe jibu. Na pengine jibu lako litatoa fununu kuhusu lengo hasa la maisha na falsafa yako nzima kuhusu kuwako kwako katika sayari hii iitwayo Dunia. Binadamu !!!

MZAZI ANAPOMSHAWISHI MTOTO KUJIFELISHA MTIHANI ILI KUKWEPA GHARAMA ZA KUMLIPIA !!!

2011-08-05T18:17:00.001+03:00

Nikiwa Kama Mzazi Habari Hii Imenisikitisha

Karibu wazazi wote tunawatakia watoto wetu maisha mema. Ndiyo maana tunahangaika usiku na mchana ili angalau safari yetu ikishakamilika hapa duniani basi tuwaachie angalau kitu kidogo kitakachowasaidia wakati sisi hatupo.

Na katika urithi bora kabisa ambao tunaweza kuwaachia watoto wetu ni elimu bora. Wenye uwezo wanatumia maelfu ya dola kuwasomesha watoto wao nchi za nje. Wengine wanajibidisha kuwapeleka watoto wao katika shule binafsi wakiamini kwamba huko watapata elimu bora. Wazazi leo wanakazana kuwapeleka watoto wao wanaoanza shule katika "akademi" zinazofundisha kwa kutumia lugha ya Kiingereza ili kuwapa misingi imara ya lugha hiyo watoto wao.

Na sababu kubwa iliyotufanya wengi wetu tuliolowea huku ughaibuni na kubeba maboksi ni elimu bora kwa ajili ya watoto wetu. Elimu bora ndio urithi bora kabisa tunaoweza kuwaachia watoto wetu.

Nilipoisoma habari hii hapa chini kuhusu wazazi wanaowashawishi watoto wao kufeli ili kuepuka gharama za kuwasomesha niliwasikitikia wazazi hao pamoja na hawa watoto. Je, serikali inalijua tatizo hili? Kuna utaratibu wowote wa kuweza kuwasaidia watoto kama hawa ili nao wakaendelea kusoma? Kama upo, unafahamika kwa walengwa? Iweje tunapoteza mabilioni kutokana na ufisadi lakini hatuwezi kuwasaidia watoto wetu hawa kujipatia elimu?

********

‘Wazazi wanawashawishi watoto wao kufeli’

Imeandikwa na Peti Siyame, Sumbawanga; Tarehe 7 Mei 2011

MATOKEO mabaya ya wanafunzi wanaomaliza elimu ya msingi kila mwaka mkoani Rukwa yanasababishwa na baadhi wazazi na walezi ambao wamekuwa wakiwashawishi watoto wao kufanya vibaya katika mitihani ya mwisho ili kukwepa wajibu wao wa kuwagharamia kielimu katika ngazi inayofuata.

Diwani wa Kata ya Milepa iliyopo wilayani Sumbawanga, Apolinary Macheta alisema hayo wakati akichangia mada kwenye mkutano wa Wadau wa Elimu wa Wilaya ya Sumbawanga uliofanyika juzi katika Kata ya Laela wilayani humo.

Alisema kuwa baadhi ya wazazi na walezi wamekuwa na tabia kuwashawishi watoto wao kufanya vibaya katika mitihani yao ya kumaliza darasa la saba kwa lengo la kukwepa majukumu ya kuwalipia ada na michango mingine au wakati mwingine wakitaka kuwaoza watoto wao wa kike.

Diwani huyo aliongeza kuwa kwa upande wa watoto wao kiume, wazazi hao wamekuwa wakiwashawishi kufanya hivyo ili wajishughulishe na shughuli mbalimbali za kiuchumi ambazo ni kilimo, uvuvi na biashara kwa madai kuwa ndizo zenye tija kuliko kuendelea na elimu.

“Tatizo la kutofanya vizuri kwenye mtihani wa mwisho kwa watoto wengi wa vijijini ni wazazi wenyewe ….. hawataki waendelee na sekondari kwa hiyo wanawashawishi kufeli kwa lengo la kukwepa gharama ya kulipa ada na michango mingine, pia kutaka kuwaoza watoto wao wa kike sasa inapotokea mtoto mwenye uwezo mzuri darasani anafeli tufuatilie matokeo yake tangu awali yalikuwaje,” alisema Diwani Macheta.

Katika hatua nyingine, Mkurugenzi wa Halmashauri hiyo Christian Lazer alisema kuwa ni aibu wilaya hiyo kuendelea kuwa na watu wanaosoma kupitia Mpango wa Elimu ya Msingi kwa Walioikosa (MEMKWA) na kusema kuna kila sababu watendaji wa vijiji kuhamasisha wazazi na walezi kuwaandikisha watoto wenye umri wa kwenda shule kwa wakati.

Alisema kuwa kufanya hivyo kutasaidia kuondokana na udhaifu huo wa uandikishaji uliopo hivi katika halmashauri hiyo wenye zaidi ya vituo vya 23 vya MEMKWA ambavyo vinawanufaisha watu wasiojua kusoma na kuandika.

Chanzo: Habari Leo

DAWA YA BABU WA LOLIONDO: MARA INATIBU, MARA HAITIBU...

2011-08-04T17:21:00.001+03:00

Dawa hiyo iliwahi kufagiliwa na wataalamu kwamba ni kinga dhidi ya magonjwa mbalimbali. Serikali ikatoa tamko (japo kwa kuchelewa sana) kwamba dawa hiyo haifanyi kazi. Utafiti mpya wa Taasisi ya Synovate unasema dawa hiyo inaponyesha na kwamba asilimia 78 ya waliokunywa wamepona. Sasa yupi anasema ukweli?

Hili siyo jambo la mzaha kwa sababu linahusu maisha ya watu; na kule kwetu Unyantuzu wagonjwa wengi wa UKIMWI wameacha kutumia madawa ya kuongeza nguvu baada ya kunywa kikombe cha babu. Kuna ugumu gani kuwapima watu hawa kama wamepona UKIMWI au bado na hivyo kujua kwa uhakika kama dawa hii inaponyesha ama la? Japo kasi imepungua lakini vikombe vipya vingali vikiibuka. Je, vinatibu?

Hii pia inaonyesha kwa uwazi jinsi tunavyoendesha mambo yetu kimparaganyikoparaganyiko tu. Hakuna umakinifu hata kwa mambo ya muhimu kama haya. Halafu tunashangaa eti ni kwa nini mpaka leo bado hatuna umeme wa kuaminika!

UJUMBE WA LEO: NI NANI ALIKWAMBIA KWAMBA ATI HUWEZI ???

2011-08-04T16:38:00.000+03:00

Katende !!!

MBUNGE WANGU KWELI NI NG'OMBE DUME MWENYE MAPEMBE ???

2011-08-03T20:07:00.004+03:00

Maendeleo hafifu ya operesheni ya kihiari ya kujivua gamba inayoendelea ndani ya CCM inaendelea kuzusha mijadala na hata mikanganyiko. Baada ya "Mheshimiwa" Rostam Aziz kujivua gamba hivi karibuni, watu wamekuwa wakisubiri kuona matokeo zaidi ya operesheni hii. Jina la mbunge wangu limekuwa likitajwa sana kuwa ni gamba nambari wani ndani ya CCM na kama kweli chama hicho kimedhamiria kujisafisha ni lazima gamba hilo livuliwe.

Katika makala zake za Neno la Leo, mwandishi na mchambuzi mahiri Maggid Mjengwa ameandika kuhusu ng'ombe dume wenye mapembe (ambao hujulikana kama kambako kule Usanguni) na ugumu wa kuwatoa zizini (Bofya HAPA). Katika makala yake fupi lakini yenye kufikirisha, Mjengwa anaashiria kwamba mbunge wangu Andrew Chenge a.k.a Mzee wa Vijisenti ni "kambako" ambaye amegoma kutoka zizini hata baada ya kuumwa mkia. Katika kuchangia maoni yangu huko nimesema yafuatayo kuhusu ng'ombe dume anayegoma kutoka zizini hata baada ya kumuuma mkia.

*********************

"Kule kwetu Usukumani kambako huitwa nzagamba au nziku; na wakati mwingine huwa tunawatumia katika kilimo. Nzagamba akizira; na ukamtandika viboko bila mafanikio, njia ya uhakika ni kuushika mkia wake na kuupinda - kama vile wataka kuuvunja. Hapo ni lazima atanyanyuka tu atake asitake.

Tahadhari hata hivyo ni kwamba akinyanyuka aweza kuwa na hasira kutokana na maumivu na inabidi uwe mwangalifu kwani aweza kukutwisha mapembe. Au anaweza kunyanyuka na bado akazira kuvishwa minyororo kwenda kulima. Hapa inabidi utafute wanaume hasa tena wenye uzoefu wanaoweza kumvisha minyororo na kumtoa zizini kwa nguvu atake asitake.

Swali pengine ni kwamba kama tukipinda mkia na nzagamba bado akaendelea kuzira, tunao wanaume wa shoka wa kuweza kumtoa zizini kwa nguvu?"

*************

Pamoja na kwamba nimekuwa nikiandika hapa mara kwa mara kuhusu mbunge wangu huyu, pengine umefika wakati wa kujiuliza kama kweli ni gamba a.k.a kambako a.k.a nzagamba. Serikali na TAKURURU wameshamsafisha na yaliyobakia ni maneno tu ya hapa na pale. Kama kweli ni gamba mbona asijivue au kuvuliwa mara moja? Kama anayo kesi ya kujibu kuhusu mabilioni ya rada, mbona asipelekwe mahakamani? Tetesi, uvumi na udaku tu utatufikisha wapi kwa mtu aliyeliingizia taifa hasara ya mabilioni ya shilingi? Ndiyo maana nauliza: Tunao ushahidi wo wote kwamba mbunge wangu huyu ni "kambako?"

OOOPS! KUMBE ATC HAINA HATA NDEGE MOJA INAYOFANYA KAZI !!!

2011-08-03T15:18:00.001+03:00

Ni Shirika letu la ndege la Taifa (ATC). Lilianzishwa mwaka 1973 likiwa na ndege 11. Kwa sasa hata hivyo hakuna hata ndege moja inayofanya kazi.

Tatizo hasa la Shirika hili ni nini? Kwa nini Precision ifanye vizuri hivi na shirika la taifa lishindwe? Na bado serikali iko katika mchakato wa kulimwagia "vitendea kazi na mtaji" mpya. Shirika hili litaendelea kutafuna mabilioni ya walipa kodi mpaka lini? Kwa nini tunazidiwa hata na vinchi vidogo kama Burundi na Rwanda? Kwa habari zaidi soma HAPA

ATI, WENGINE HAWAKUSTAHILI KUNYANYULIWA MIKONO?

2011-08-02T11:34:00.001+03:00

(2) Ati, bado kuna wengine ambao hawakustahili kunyanyuliwa mikono na bado "hawajaishusha"? Kama wapo, tuwafanyeje?

Ujumbe wangu (kwa njia ya picha) kwa wanyanyua na wanyanyuliwa mikono unapatikana HAPA. Mungu Ibariki Tanzania !!!

TUPO KATIKA MSIMU WA MASHINDANO YA UREMBO

2011-08-02T08:01:00.006+03:00

Kuna misimu mingi. Kuna misimu ya mananasi, machungwa, mapera, maembe, kipindupindu n.k. Kwa sasa inavyoonekana tupo katikati ya msimu wa mashindano ya urembo ambayo yamejitandaza kila kona. Kuna Miss Vodacom Temeke, Ilala, Kinondoni….Kuna Miss Vodacom ngazi ya mikoa, kanda na hatimaye taifa. Kuna Miss Utalii katika ngazi mbalimbali. Kuna Miss Redds pia katika viwango mbalimbali. Kuna Miss Vyuo Vikuu. Kuna Miss Mlimani City Center. Kuna Miss Lake Zone. Kuna Miss...Hata huwezi kuelewa miss yupi ni yupi katika mtafaruku huu.

Japo mwanzoni niliyashambulia mashindano haya (Tazama pia HAPA), ukweli ni kwamba hayaepukiki hasa katika kipindi hiki cha utandawazi tulichomo. Maji tushayavulia nguo, ni lazima tuyakoge ati!

Kwa vile mashindano haya yanapendwa sana na yanatangazwa mno katika vyombo vya habari; ni wazi kwamba kupitia kwayo makampuni yanayoyafadhili yanapata muda mzuri wa kujitangaza kibiashara. Mteja ni lazima afikiwe kwa njia yo yote ati!

Jambo linalovutia na kutia moyo ni kwamba mengi ya makampuni haya pia yamejibidisha sana kushiriki katika miradi mbalimbali ya kijamii. Tumeshuhudia makampuni kama Vodacom yakinunua maelfu ya madawati na kujenga madarasa, nyumba na ofisi za walimu kwa ajili ya wanafunzi wetu wanaoendelea kusomea katika mazingira magumu. Hili ni jambo la kutia moyo na makampuni haya yanabidi kutiwa moyo ili yaendelee kumakinikia zaidi misaada hii ya kijamii kwani bila kuwa na uhusiano mzuri na jamii, kamwe hayawezi kufanya vizuri na kujijengea hadhi. Vita vya ukombozi wa kijamii si vya serikali peke yake. Ni vyetu sote yakiwemo makampuni haya!

"KICHENI PATI" INAPOSHINDWA KUZAA MATUNDA (UCHESHI)

2011-08-02T02:57:00.004+03:00

(Sikumbuki nilikoipata katuni hii. Kama ni yako tuwasiliane!)

Nilishawahi kuuliza kuhusu maana hasa ya "kitchen party" na umuhimu wake kwa wanandoa HAPA. Mjadala unaweza kuendelea!

UJUMBE WA LEO: SIYO WOTE WANAOTANGATANGA WAMEPOTEA

2011-07-31T08:03:00.006+03:00

Wengine wanajua waendako.....

BUNGE LA SAFARI HII KAZI KWELIKWELI....

2011-07-30T07:38:00.003+03:00

Ni kweli mkokoteni huu umemwelemea huyu mama wa shoka? Wananchi wana maoni gani kuhusu mkokoteni huu kuwa "mzito" hivi? Hili ni jambo jema?

Pengine "waheshimiwa" wetu hawa siku moja nao watazipiga kama wenzao HAWA. Kwa habari zaidi soma HAPA, HAPA na HAPA. Katuni ni kutoka Katuni Inasema na Wavuti.

FIKRA YA IJUMAA: TUSIJE TUKAJENGA JAMII KAMA HII YA WAMAREKANI !!!

2011-07-29T17:18:00.002+03:00

Uchambuzi mpya uliofanya kutokana na data za sensa hapa Marekani unaonyesha kwamba pengo la kipato kati ya walionacho na wasionacho linazidi kupanuka.

Uchambuzi huu umeonyesha kwamba kipato cha wazungu ni mara 20 ya kile cha watu weusi na mara 18 ya kile cha watu wenye asili ya Kilatino. Kipato cha wastani kwa familia za kizungu mwaka 2009 kilikuwa dola 113,149 ikilinganishwa na dola 6,325 katika familia za watu wenye asili ya Kilatino na dola 5,677 familia za watu weusi.

Sote tunajua kwamba Marekani bado inasumbuliwa na ubaguzi wa rangi na kusema kweli watu ambao si wazungu bado wana uwezekano mkubwa zaidi wa kwenda jela, kutokuwa na elimu bora, kutopata kazi nzuri, kuishi katika umasikini na kufariki mapema kuliko wenzao wazungu.

Matabaka haya yana madhara makubwa kijamii kiasi kwamba jamii nzima inaathirika. Marekani ndiyo nchi yenye wafungwa wengi magerezani na katika baadhi ya majimbo bajeti ya kuendesha magereza inazidi, inalingana na au kupungua kidogo tu ile ya elimu. Jamii ya aina hii ni wazi kwamba ina matatizo na hii ni mojawapo ya sababu inayotajwa sana kuwa ni tatizo kubwa la mfumo wa kijamii wa Kimarekani, mfumo ambao pengine utaweza kuchangia katika kuporomoka kwake.

Sisi tunaingiaje katika mtafaruku huu? Tunaendelea kulea matabaka: watu wachache wanajitajirisha sana tena kwa kutumia raslimali za wote wakati wananchi wetu wengi wanazidi kuwa masikini. Kama unabisha nenda huko vijijini ukaone. Bado hatujaweza hata kuwapatia watu wetu huduma za msingi kabisa wakati tunao mafisadi wanaofuja mabilioni ya pesa za umma, pesa ambazo kama tungezitumia vizuri zingeweza kusaidia kuinua hali za maisha za wananchi wetu ambao ni masikini hasa huko vijijini.

Picha kutoka Mzee wa Matukio

Hali hii ikiachiwa kuendelea ni wazi kwamba tunakoelekea si kuzuri kwani binadamu ni mnyama mwenye kujua ukomo wake. Unaweza kumnyonya, kumsikinisha, kumdhulumu na kumtesa lakini siku moja atafikia kikomo na kusema liwalo na liwe. Akifikia hali hii basi jamii inaingia katika misukosuko mikubwa. Historia imejaa mifano mingi ya aina hii.

Ati, mahusiano yetu ya kitabaka leo yangekuwaje kama kweli tungezitumia raslimali zetu kwa faida ya wote?

TANGAZO: TATIZO KUHUSU E-MAIL YANGU YA GMAIL (NA MENGINEYO)

2011-07-29T16:16:00.003+03:00

Wapendwa: Inbox na Sentbox ya Email yangu ya gmail (profesamatondo@gmail.com) zilifutwa na pengine zilijifuta (kama google walivyodai) na imenichukua muda kupata usaidizi wa Google kuzirudisha japo sina uhakika kama meseji zote zimerudishwa. Kwa sasa najibu e-mail za watu polepole hasa zile za muhimu.

Kwa hivyo kama uliniandikia na hukupata jibu, naomba radhi. Naahidi kwamba nitajibu meseji zote za kibinafsi......

Kuhusu kutoonekana hapa kibarazani kwangu na katika vibaraza vya wanablogu wenzangu mara kwa mara ni kutokana na hekaheka za safari na mabadiliko makubwa ya kimaisha na kifamilia ninayokabiliana nayo kwa sasa. Naamini mambo yatatulia na kurudi katika hali yake ya kawaida. Tuko pamoja na kamwe sitakaa niache kublogu na kusoma blogu za wanablogu wenzangu. Kublogu ni mojawapo ya mambo ya muhimu kabisa ambayo nimeshawahi kufanya katika maisha yangu.

NI KWELI DAWA YA BABU HAIFANYI NA HAIJAFANYA KAZI ???

2011-07-28T17:29:00.002+03:00

Nimesoma habari hii kwa mshangao kidogo. Ni kweli dawa ya babu haitibu na haijawahi kutibu? Vipi kuhusu vigogo waliokuwa wakimimika huko na kuaminisha watu kwamba ilikuwa inatibu? Vipi kuhusu akina Mrema na watu wengine waliothibitisha kwamba ilikuwa imewaponyesha? Vipi kuhusu utafiti wa "wataalamu" ikiwemo ripoti ya awali ya Taasisi ya Taifa ya Utafiti wa Magonjwa ya Binadamu (NIMR) iliyothibitisha kwamba dawa hiyo ni kinga mathubuti kwa magonjwa mbalimbali?

Hata kama ni kweli kwamba dawa hii haitibu, kisiasa ilikuwa ni "tiba" tosha katika kipindi ambacho taifa lilikuwa linapita katika vuguvugu la kashfa mbalimbali zikiwemo DOWANS na RICHMOND. Badala ya kuripoti kuhusu mambo haya muhimu kisiasa, vyombo vya habari vilitupia hasa macho yao Loliondo na sehemu zingine nchini ambako watoa vikombe walikuwa wakiibuka kila siku. Moto huu uliendelea kuchochewa na viongozi wa serikali na chama waliokuwa wakimiminika huko Loliondo kupata hiyo tiba ingawa wengine walidai kwamba walikuwa wanakwenda huko kwa ajili ya "curiosity" tu na si vinginevyo. Viongozi kadhaa wa upinzani walilalamikia jambo hili na kusema kwamba serikali ilikuwa inashabikia tiba hizi za kiimani ili kujaribu kupoteza mwelekeo wa kesi na kashfa mbalimbali za kifisadi zilizokuwa zikiiandama.

Kama madai haya ni kweli basi si kweli kudai kwamba eti tiba hii ya babu haitibu. Ilikuwa tiba tosha kisiasa na imeshafanya kazi yake; na sasa babu anaweza kuendelea na shughuli zake nyingine. Kuna anayejua sakata la DOWANS lilikoishia? RICHMOND je?

MAFITHADI THUGU.......

2011-07-09T17:03:00.003+03:00

Mimi naendelea kuuliza tena na tena, hili zoezi la kujivua magamba litamalizika lini? Tusipokuwa makini nyoka wetu huyu atabakia na mabakamabaka kila mahali - hapa ngozi mpya na pale kuukuu tena iliyokakawana. Kama kujivua kumeshindikana, pengine tujaribu kuvulishana - hata kama ni kwa "kumwagiana tindikali". Mkanganyiko!

MBUNGE WANGU AZIDI KUBANWA. SASA NAPE ADAI NI LAZIMA AJIVUE GAMBA...

2011-07-09T05:50:00.001+03:00

Sakata la Mbunge wangu (Bwn. Chenge) kuhusu ununuzi wa rada ambalo nilianza kulijadili jana linazidi kuchukua sura mpya. Hata baada ya "kusafishwa" rasmi na serikali pamoja na TAKURURU, wakuu wa chama chake bado wanamtaka ajivue gamba.

Dr. Slaa naye tayari ameshawasilisha serikalini uchambuzi wa ushahidi utakaosaidia kumtia hatiani Chenge. Sijui mbunge wangu huyu kama safari hii atasalimika.

Sakata hili pia inaibua swali jingine: Ati, ni kwa nini wanasiasa wa Afrika ni wagumu sana kuwajibika na kujiuzuru hata kama tayari ni matajiri wa kutupwa? Kwa nini wanasiasa wa nchi za Magharibi wakiguswa na ka kashfa tu kadogo basi wanawajibika na kuachia ngazi mara moja?

MBUNGE WANGU JAMANI MBONA HAKIELEWEKI? MARA YUMO MARA HAYUMO...

2011-07-07T07:32:00.004+03:00

Ni mbunge wangu bilionea Bwn. Andrew Chenge. Ni kuhusu lile sakata la ununuzi wa ile rada yetu ya bei mbaya. TAKURURU walishamsafisha. Na mwenyewe pia alishajitakasa. Wakati huo huo serikali kupitia kwa waziri wake wa Nchi Ofisi ya Rais, Mathias Chikawe imetangaza rasmi kwamba mbunge wangu hakuhusika kwa namna yo yote ile na sakata hili.

Wakati huo huo timu ya Wabunge waliokwenda Uingereza hivi karibuni kufuatilia malipo ya rada hiyo imependekeza kwamba Bwn. Chenge pamoja na wenzake waliohusika na kashfa hii iliyoliletea taifa hasara kubwa wafikishwe mahakamani. Katika taarifa yao, Chenge anatajwa kuwa ni mtuhumiwa namba moja pamoja na aliyekuwa Gavana wa Benki Kuu, Dk Idrisa Rashid.

Baadhi ya wabunge wa timu hiyo: mbunge wa Bariadi Mashariki, John Cheyo (kulia), mbunge wa Ilala, Idd Zungu (katikati) na mbunge ambaye pia ni Naibu Spika Job Ndugai (kushoto).

Kutokana na taarifa hii, mnadhimu Mkuu wa Upinzani Bungeni na Mbunge wa Singida Mashariki, Tundu Lissu amechimba mkwara kwamba Chenge asipofikishwa mahakani basi CHADEMA watafanya maandamano nchi nzima mpaka kieleweke!

Mkanganyiko huu umeniachia maswali mengi. Kama mbunge wangu kweli ana hatia kama inavyodaiwa, kwa nini TAKURURU na serikali wameshamsafisha? Ningetegemea kwamba katika kipindi hiki cha kujivua magamba, chama tawala na serikali yake wangekuwa wakali na kutumia sakata kama hili kuonyesha kwamba kweli wamedhamiria kujisafisha. Je, huu ni mwendelezo wa ile tabia sugu ikerayo sana ya kulindana na kukingiana kifua?

Ndiyo maana imebidi niulize kama mbunge wangu ana hatia ama la kwani siamini kama kweli katika kipindi hiki cha mtandao na upatikanaji huru wa habari, wavua magamba wangali wanategemea kwamba wataweza kweli kuzima na kuifunika kashfa nzito kama hii.

Kunakaribia kupambazuka sasa na anayedhani kwamba kungali bado usiku wa manane anajidanganya. Hebu ubaridi wa alfajiri na ukatusisimue na kutuondolea hofu, matongotongo na fikra zetu za kitwana.

CCM KUANZA KUSHEREHEKEA MIAKA 50 YA UHURU - TAARIFA YA KATIBU MWENEZI

2011-07-04T08:01:00.011+03:00

Mwaka huu Sehemu ya nchi yetu, yaani Tanzania Bara itaadhimisha miaka hamsini ya Uhuru wake toka kwa Wakoloni. Uhuru huu uliopatikana miaka hamsini iliyopita ni kazi nzuri na ya Kizalendo iliyofanywa na Chama cha TANU. Chama Cha Mapinduzi katika kukumbuka kazi hii nzuri ya kutafuta Uhuru wa nchi yetu kimeamua kufanya shughuli mbalimbali za kukumbuka kuzaliwa kwa chama kilicholeta Uhuru wa Tanzania Bara yaani TANU.

Itakumbukwa TANU ilizaliwa tarehe 7/7/1954 hapa Dar es salaam katika mtaa wa New street ambao kwa sasa unafahamika kama mtaa wa Lumumba mahali ambapo sasa ni Ofisi Ndogo ya CCM Makao Makuu. Huo ukawa ndio mwanzo wa harakati za kudai Uhuru, Utu na Heshima ya Mwafrika katika nchi yetu.

Kwa kuienzi historia na kazi nzuri na ya Kizalendo iliyofanywa na TANU, Chama Cha Mapinduzi kimeamua katika kuadhimisha miaka hamsini ya Uhuru wa Tanzania Bara kuandaa shughuli mbalimbali za kijamii zikiwa na kauli mbiu Uhuru na Kazi, kauli maarufu katika miaka ya nyuma ambayo Baba wa Taifa Mwalimu J. K. Nyerere aliitoa katika hotuba yake ya kusisimua siku ya mkesha wa Uhuru wa Tanganyika mwaka 1961. Mwalimu Nyerere aliitumia hotuba hiyo kuwaeleza wananchi wajiandae kuanza kufanya kazi kwa bidii ili kujiletea wao wenyewe na nchi maendeleo.

Maadhimisho haya yatafanyika nchi nzima kuanzia ngazi za matawi na kuwashirikisha wanachama wetu na wananchi wote kwa ujumla. Shughuli zitakazofanyika ni kama zifuatavyo:

i. Usiku wa kuamkia tarehe 7/7/2011 Vijana wa CCM nchini watakutana maeneo mbalimbali kufanya shamrashamra za kuzaliwa TANU

ii. Tarehe 7/7/2011 asubuhi wanachama wa CCM na wananchi watakutana kwenye matawi yao na kufanya shughuli mbalimbali za kijamii kama vile, kufanya usafi, kusaidia ujenzi, kupanda miti, kutembelea wagonjwa mahospitalini n.k.

iii. Ikiwezekana kufanya matamasha mbali mbali yatakayowashirikisha vijana,wasomi,wanasiasa na wazee kujadili masuala mbali mbali yenye faida kwa Kata, Wilaya, Mkoa au Taifa kwa ujumla.

iv. Kufanya mikutano ya hadhara na kujikumbusha mafanikio yaliyopatikana kwa kila Mkoa na Wilaya katika kipindi cha miaka 50 ya Uhuru. Kwa Sehemu kubwa tunategemea walezi wa CCM wa Mikoa na Viongozi mbalimbali wa Kitaifa watashiriki shughuli hizo mikoani.

Sherehe hizi zitaanza usiku wa tarehe 6/7/2011 kwa vijana wa CCM sehemu mbalimbali nchini kukutana na kusherehekea ikiwa ni pamoja na kufyatua MAFATAKI saa sita usiku ya siku hiyo, kama ishara ya kuzaliwa TANU.

Mwenyekiti wa CCM Taifa Dr. Jakaya M. Kikwete atashiriki sherehe hizi mkoani Dar es salaam, usiku wa Tarehe 06/07/2011 na tarehe 07/07/2011 asubuhi atakutana na Mabalozi wa Nyumba Kumi Mkoa wa Dar es salaam. Ni mategemeo yangu vyombo vya habari vitashirikiana nasi katika kuuelimisha umma kuhusu historia hii muhimu ya Taifa letu na kutangaza matukio yote yatakayo ambatana na maadhimisho haya. Ahsanteni sana.

Nape M. Nnauye, KATIBU WA HALMASHAURI KUU YA TAIFA, ITIKADI NA UENEZI 03/07/2011

*************

Angalizo

Jambo la muhimu linalokosekana katika taarifa hii ni kuhusu matatizo na changamoto ambazo TANU na baadaye CCM i-li/me/mesha/na-pambana nazo. Ningependa sana kusikia, mbali na mafanikio yaliyopatikana, changamoto zinazotukabili kama taifa na la muhimu zaidi - mikakati ya kupambana na changamoto hizo.

Ni nusu karne sasa imepita na japo ni wazi kwamba tumepiga hatua, ni lazima pia tujikumbushe wapi tulipojikwaa na tunachukua hatua gani kuzuia tusijikwae tena. Kama safari yetu haijaenda sawasawa kama tulivyotegemea, ni kwa nini? Zipi ni kero kubwa (na zipo nyingi tu) zinazowakabili watu wetu? Tutazitatuaje?

Kukusanyika ili kusherekea mafanikio pekee ni kujivika kilemba cha ukoka...

Vinginevyo Happy Birthday TANU/CCM. Na pengine si vibaya tukiisikiliza tena sauti hii yenye kuchoma kuhusu zimwi letu kuu angamizi linatotuandama na kukwamisha maendeleo yetu. Mungu Ibariki Tanzania !!!

WANAHISABATI MPO? NAMBA MPYA IITWAYO "Tau" YAPENDEKEZWA KUCHUKUA MAHALI PA "Pi"

2011-07-02T21:17:00.008+03:00

Yadaiwa Pi ina matatizo (Soma HAPA).
"Tau" - namba ambayo ni kubwa kuliko "Pi" mara mbili (6.28) ina uhalisia zaidi katika ulimwengu wa hisabati kuliko "Pi"
Tarehe 28/6/2011 sherehe za kuunga mkono Tau zilifanyika duniani kote.

Hii Picha iko HAPA

Jitihada za kukubaliwa rasmi kwa "Tau" zinaendelea na kama zikifanikiwa basi itabidi kuondoa matumizi ya "Pi" katika vitabu na kuanza kutumia "Tau"
Kwa Wataalamu wa Hisabati mnaweza kutufafanulia zaidi faida za hii namba mpya. Kama nilivyowahi kusema HAPA, somo la Hisabati ndiyo somo-mama na ni kosa kubwa kulidharau na kutolifundisha vizuri.

******

Mathematicians Want to Say Goodbye to Pi

"I know it will be called blasphemy by some, but I believe that pi is wrong.

That's the opening line of a watershed essay written in 2001 bymathematician Bob Palais of the University of Utah. In "Pi is Wrong!" Palais argued that, for thousands of years, humans have been focusing their attention and adulation on the wrongmathematical constant.

Two times pi, not pi itself, is the truly sacred number of the circle, Palais contended. We should be celebrating and symbolizing the value that is equal to approximately 6.28 — the ratio of a circle's circumference to its radius — and not to the 3.14'ish ratio of its circumference to its diameter (a largely irrelevant property in geometry).

Last year, Palais' followers gave the new constant, 2pi, a name: tau. Since then, the tau movement has steadily grown, with its members hoping to replace pi as it appears in textbooks and calculators with tau, the true idol of math. Yesterday — 6/28 — they even celebrated Tau Day in math events worldwide.

But is pi really "wrong"? And if it is, why is tau better?

The mathematicians aren't saying that pi has been wrongly calculated. Its value is still approximately 3.14, as it always was. Rather they argue that 3.14 isn't the value that matters most when it comes to circles. Palais originally argued that pi should be changed to equal 6.28 while others prefer giving that number a new name altogether.

Kevin Houston, a mathematician at the University of Leeds in the U.K. who has made a YouTube video to explain all the advantages of tau over pi, said the most compelling argument for tau is that it is a much more natural number to use in the fields of math involving circles, like geometry, trigonometry and even advanced calculus.

"When measuring angles, mathematicians don't use degrees, they use radians," Houston enthusiastically told Life's Little Mysteries, a sister site to LiveScience. "There are 2pi radians in a circle. This means one quarter of a circle corresponds to half of pi. That is, one quarter corresponds to a half. That's crazy. Similarly, three quarters of a circle is three halves of pi. Three quarters corresponds to three halves!" [A Real Pie Chart: America's Favorite Pies]

"Let's now use tau," he continued. "One quarter of a circle is one quarter of tau. One quarter corresponds to one quarter! Isn't that sensible and easy to remember? Similarly, three quarters of a circle is three quarters of tau." Making tau equal to the full angular turn through a circle, he said, is "so easy and would prevent math, physics and engineering students from making silly errors."

A better teaching tool

Aside from preventing errors, as Palais put it in his article, "The opportunity to impress students with a beautiful and natural simplification has turned into an absurd exercise in memorization and dogma."

Indeed, other tau advocates have said they've noticed a significant improvement in the ability of students to learn math, especially geometry and trigonometry where factors of 2pi show up the most, when the students learn with tau rather than pi.

Though 2pi appears much more often in calculations than does pi by itself (in fact, mathematicians often accidentally drop or ad that extra factor of 2 in their calculations), "there is no need for pi to be eradicated," Houston said. "You might say I'm not anti-pi, I'm pro-tau. Hence, anyone could use pi when they had a calculation involving half of tau."

Tau, the 19th letter of the Greek alphabet, was chosen independently as the symbol for 2pi by Michael Hartl, physicist and mathematician and author of "The Tau Manifesto," and Peter Harremoës, a Danish information theorist. In an email, Houston explained their choice: "It looks a bit like pi and is the Greek 't,' so fits well with the idea of turn. (Since tau is used in angles you can talk about one quarter turn and so on.)"

Pi is too ingrained in our culture and our math to succumb to tau overnight, but the movement pushes ever onward. "Change will be incremental," Houston said.

Chanzo: Yahoo

FIKRA YA IJUMAA: ATI, DAIMA MTOTO WA NYOKA NI NYOKA?

2011-07-01T09:00:00.000+03:00

Katuni ya Nathan Mpangala

Kwa hali ya sasa nchini mwetu nani ni mla rushwa na yupi ni mwadilifu? Daima ni kweli kwamba mtoto wa nyoka ni nyoka? Ni lazima tuupime uadilifu wa mtu kwa kuzingatia wasifu na dhambi za wazazi wake? Historia inasemaje? Rushwa ni suala la kimfumo lakini utatuzi wake tunauchakura katika jalala la hulka na uadilifu wa mtu mmoja mmoja. Tutafanikiwa?

Samahani kwa maswali mengi yasiyo na maana. Ni hiki kibonzo cha Mpangala kimenifikirisha sana. Ijumaa na Wikiendi njema wadau!

AFRIKA - BARA LENYE UTAJIRI USIO NA WENYEWE !!!

2011-07-01T05:08:00.003+03:00

Wanakuja na Kuchukua Raslimali zetu. Wanaofaidika ni wasaliti wachache tuliowapa tochi watumulikie njia!

Picha hii iko HAPA

Halafu Wanaondoka Wakiwa Wamenenepeana na Kutuacha Sisi Tukiwa Hoi Bin Taaban. Mpaka lini?

Picha hii iko HAPA

WANAUME NI WATUMWA WA NGONO ?

2011-06-30T08:00:00.002+03:00

Ati, ni kosa kwa huyu mwanafunzi kuwaza haya anayoyawaza?

Inasemekana kwamba Sigmund Freud aliwahi kusema kwamba fikra za mwanaume na karibu kila kitu anachokifanya vimetawaliwa na ngono; na kwamba eti mwanaume huwaza ngono kila baada ya sekunde saba!

Japo takwimu hizi zinaonekana zimetiwa chumvi lakini zinatosha kuonyesha jinsi ambavyo ngono imetawala maisha ya mwanaume. Kuhusu utafiti unaotoa fununu juu ya uzinzi wanaume bofya HAPA.

Nimemkumbuka Sigmund Freud baada ya kusoma kisa hiki cha Ben kutoka katika gazeti la wanafunzi hapa chuoni. Naogopa kupoteza utamu na hivyo sijakitafsiri.

*******************

A man and his wife are in the shower together when the doorbell rings. The wife puts on a robe and goes down to answer the door. In walks her husband’s friend Ben. The woman tells him that her husband is in the shower and asks if he can come back later.

nstead, Ben steps in and quietly says, “I have $400 in my pocket. I will give it to you if you will open your bathrobe for me.” She is offended, but really needs the money, so she agrees, opens her robe, and lets Ben have a quick peek before doing it up again. Ben gives her the $400, and she opens the door for him to leave, but he says, “I have another $400 in my other pocket. I will give it to you if you let me touch your breasts.” Now she is really mortified, but again, she needs the money, so she undoes her robe and lets him have a quick feel. Taking the other $400 from him, she lets him out of the door.

Going back upstairs, she gets back in the shower with her husband, feeling a little bit guilty.

“Who was that?” the husband asks.

“Oh, that was just Ben,” the wife answers

Ben?” the husband says. “That son of a bitch owes me 800 bucks!”

*******************

Wanaume mpo? Hatuelezwi kilitokea nini kati ya wanandoa hawa. Kama wewe ndiye mume wa huyu mama halafu mama awe na ujasiri wa kukupa stori nzima kumhusu rafikiyo Ben, ungefanya nini? Ni kweli kwamba wanaume sisi ni watumwa wa ngono? Ukiombwa useme ukweli, utajibuje swali hili: Wewe huwaza ngono mara ngapi katika sekunde, dakika, saa, siku, juma, wiki, mwezi, mwaka, muongo, karne, milenia moja?

SIMU ZA MKONONI NA KANSA YA UBONGO: BALAA JINGINE KWA AFRIKA?

2011-06-29T08:01:00.005+03:00

Picha hii iko HAPA

Kwa muda mrefu kumekuwa na mjadala mkali kuhusu nguvu za mionzi ya mnunurisho inayotolewa na simu za mkononi kama zinaweza kusababisha kansa ya ubongo ama la. Hatimaye Shirika la Afya Duniani limetoa tamko kuhusu utafiti unaoonyesha kwamba simu za mkononi zinaweza kuwa zinasababisha kansa ya ubongo. Hatari hii inasemekana kuwa ni kubwa zaidi kwa watoto wadogo na matineja kwani mafuvu yao bado hayajakomaa sawasawa.

Naomba hii isiwe kweli kwani kama tunavyojua, Afrika ndiyo jalala la bidhaa feki, mbovu na zilizoisha muda wake. Bila shaka nitakuwa sahihi nikisema kwamba simu zinazotoa mionzi hatarishi kwa binadamu na zitakazokuwa zimepigwa marufuku sehemu zingine za dunia ndizo zitarundikana Afrika.

Kama utafiti huu ni wa kweli basi miongo kadhaa tu ijayo Afrika itakumbwa na mripuko wa kansa ya ubongo – mojawapo ya kansa hatari kabisa na inayohitaji tiba ghali sana!

Tunachoweza kufanya kwa sasa ni kufuata mapendekezo yaliyotolewa yakiwemo kununua simu zisizotoa mionzi mikali zaidi, kuweka simu mbali na sikio wakati wa maongezi na kwa wenye uwezo kununua vifaa vinavyosafirisha mawimbi ya sauti kama “Bluetooth”. Vifaa hivi huwekwa sikioni na vinaweza kudaka mawimbi ya sauti ya simu iliyowekwa mfukoni au sehemu nyingine na kuyasafirisha sikioni kwa msikilizaji bila madhara yo yote.

Aina mojawapo ya kifaa cha bluetooth

Hizi simu feki kutoka Uchina zitatufikisha pabaya. Ndiyo maana naomba hili la simu za mkononi kusababisha kansa ya ubongo lisiwe la kweli. Mungu Ibariki Afrika!

HARAKATI ZA CCM KUJIVUA GAMBA ZITAMALIZIKA LINI ? NI ZOEZI LA KUDUMU ?

2011-06-28T05:45:00.000+03:00

Ili kuepuka kuwa mmezwaji huko mbele ya safari, CCM ilibidi kijivue magamba

Juhudi za CCM kujivua gamba zilipokelewa kwa furaha na matumaini makubwa na wanachama wake pamoja na Watanzania wengine wakipendacho. Japo juhudi hizi zilipondwa na kubezwa na baadhi ya wapinzani pamoja na wachambuzi, kwa wengi zilionwa kama nafasi ya pekee kwa CCM kujaribu kurudisha imani yake kwa wananchi - imani ambayo ilikuwa imeanza kupotea kutokana na tuhuma za ufisadi na makundi ndanimwe; pamoja na kupoteza mwelekeo na malengo yake ya msingi.

Ilitangazwa kwamba CCM ilikuwa imetoa siku 90 kwa watuhumiwa wote wa ufisadi kujiuzulu uanachama na kama wasingefanya hivyo basi wangewajibishwa. Kauli hii ilionyesha kwamba kweli chama hiki kilikuwa kimedhamiria kujisafisha.

Jambo la kushangaza ni kwamba baada ya muda kidogo tu kupita wakuu wapya wa chama hiki walitangaza kwamba hawakuwa na majina ya mafisadi na kwamba ile kauli ya mwanzo ya siku tisini haikuwa ya kweli. Baada ya kigugumizi cha muda mrefu kuhusu mashambulizi ya CHADEMA, hatimaye CCM wameamka na kupitia kwa Katibu wao Mwenezi wanazunguka nchi nzima kujibu hoja za wapinzani wao na kuelezea mafanikio yao.

Japo kuzunguka kwa CCM nchi nzima ni mkakati mzuri, sina uhakika kuhusu mafanikio yake. Ni kweli kuzunguka huku kunasaidia kurudisha heshima na imani ya CCM kwa wananchi? CCM imefanya tathmini na kujua wananchi wanataka nini? Isije ikawa kwamba juhudi hizi za kijasiri za Katibu Mwenezi zinaonwa na wananchi kama propaganda tu za CCM walizozizoea.

Kwa maoni yangu naona kuwa CCM inapoteza nafasi ya muhimu sana ya kuonyesha dhamira yake ya kujisafisha mbele ya Watanzania kwa vitendo. Kama kweli ilikuwa imedhamiria kujivua gamba, mbona kazi hii ifanyike nusunusu? Ndiyo maana nimeshangaa kusoma leo katika Gazeti la Chama na Habari Leo CCM ikitoa ahadi nyingine kwamba wasaliti wote ndani ya CCM watawajibishwa na kwamba mafisadi ni lazima wavue gamba. Watawajibishwa na kuvuliwa gamba na nani? Lini?

Badala ya kuwa mkakati wa maana, dhana nzima ya kujivua gamba sasa inaonekana kama kichekesho tu cha kipropaganda. Pengine CCM bado hawajayasoma na kuyaelewa mabadaliko ya kisiasa, kifikra na kimtazamo yanayotokea barani Afrika na nchini mwetu. Kama wangejua, basi wangelichukulia zoezi hili la kujivua gamba kwa dhati na bila kusuasua.

Na sijui ni kwa nini nafasi nzuri ya kujisafisha na kujirudishia imani yao kwa Watanzania inaachiwa tu ipotee namna hii. Siasa ni mchezo wa kula kuliwa na wakati mwingine inabidi kuchukua maamuzi mazito bila kujali uswahiba, utajiri na uzito wa mtu. Watanzania wanachotaka ni Maisha Bora kwa Kila Mtanzania na siyo propaganda na mikakati isiyo na meno!

UTAJIRI WA KUTISHA WA WATUMISHI WA MUNGU

2011-06-26T05:50:00.005+03:00

Baada ya Rais wa Jamhuri ya Muungano wa Tanzania, Mheshimiwa Jakaya Mrisho Kikwete kuwasha moto kwa kudai kwamba baadhi ya viongozi wa dini wanajihusisha na biashara haramu ya madawa ya kulevya, utajiri wa kutisha wa baadhi ya viongozi hawa wa dini umeanza kutiliwa mashaka.

Habari hizi zinakuja wakati ambapo injili ya utajirisho imepamba moto duniani kote. Injili hii inasisitiza kuhusu upokeaji wa mibaraka ya Mungu kama ilivyoahidiwa katika Biblia. Mara nyingi, hata hivyo, kabla hujapokea mibaraka hii ni lazima "upande mbegu" kwa kutoa - mbali na sadaka ya kawaida iliyoamriwa ya fungu la kumi - kiasi cha fedha kanisani ili kuendeleza shughuli za injili. Kwa hapa Marekani wachungaji wengi wanapendelea upande mbegu ya kuanzia dola 1,000 na hapo mibaraka ya Mungu itakushukia kama mvua - "guaranteed" !

Wapo wanaodai kwamba injili hii ya utajirisho imeweza kutumiwa vibaya na baadhi ya watumishi wa Mungu waroho ambao kwa kutumia bashasha na "miujiza" yao wameweza kuwashawishi waumini wao kuuza kila kitu walichonacho na kutoa sadaka kanisani. Na kwa kufanya hivi, watumishi hawa wa Mungu wameweza kuwa matajiri wa kutupwa wakati waumini wao wakiishi katika umasikini. Watumishi hawa wa Mungu wana majumba ya kifalme, madege binafsi ya kusafiria, helikopita na wanaendesha magari ya gharama kubwa. Hivi karibuni shirika la BBC lilichapisha makala juu ya utajiri wa kutisha wa wahubiri wa Nigeria ambao unazidi hata utajiri wa wafanyabiashara wa mafuta.

Sina ugomvi na watumishi hawa wa Mungu kutajirika lakini kama kweli wanajitajirisha kwa kupitia njia za mkato kama vile kuuza madawa ya kulevya na kuwanyonya waumini wao basi ni wazi kwamba wamesahau lengo lao la kueneza injili na kuwaleta kondoo kwa Bwana. Na kwa maoni yangu, watumishi wa Mungu wa aina hii hawana tofauti na mafisadi wanaoiangamiza jamii. Kila mtu na ashike sana alichonacho!

Hebu tumsikilize Mchungaji Munishi na wimbo wake huu niupendao sana wa "Wanamwabudu Nani".

Kwa picha na habari zaidi bofya HAPA. Tamko la Maaskofu kuhusu sakata la madawa ya kulevya lipo HAPA.

USINGIZI KWELI NI "MWANAHARAMU" KABISA.

2011-06-25T04:19:00.002+03:00

Tyson hoi bungeni. Uanasiasa......!!!

FIKRA YA IJUMAA: NATAMANI KUWA MWAFGHANISTAN !!!

2011-06-24T17:47:00.004+03:00

Picha hii iko HAPA

Pamoja na kuwa na silaha bora kutuzidi pamoja na sababu zingine za kimfumo, wapo watu wanaodai kwamba sababu hasa iliyotufanya Waafrika tukauzwa utumwani na hatimaye kutawaliwa (mpaka leo hii) ni kutokuwa na utashi kamili. Wapo wanaokwenda mbali na kudai kwamba pengine Waafrika sisi (na watu weusi kwa ujumla) tuna akili pungufu tukilinganishwa na wakazi wa nchi za Kimagharibi.

Ati, ni kwa nini tulikubali kuuzwa utumwani tena na wazungu wachache tu wenye bunduki na mizinga? Ni kwa nini tulikubali kutawaliwa na wazungu wakati wa ukoloni? Ni kwa nini tunakubali kutawaliwa hata sasa kupitia ukoloni mamboleo? Ni kwa nini tunakubali kuongozwa na wanasiasa mafisadi wasiotujali? Kwa nini Afrika kuna majanga ya kila aina: vita, magonjwa, umasikini wa kupindukia (japo Mungu katujalia kila kitu). Kwa nini? Narejerea hapa hoja zilizozushwa na Aika - binti machachari wa Kichaga aliyesimama kidete katika mjadala mkali kabisa kuliko yote iliyowahi kurindima katika blogu hii (Tazama HAPA)

Ninaandika haya baada ya Wamarekani kutangaza kuwa wataanza kuondoka Afghanistan kuanzia mwaka huu. Baada ya kuivamia nchi hiyo kwa mbwembwe nyingi huku wakijidai kuwa na silaha kali na za kila aina, leo wanaondoka bila ushindi wo wote kama Warusi. Warusi pia walijaribu "kuitawala" nchi hiyo lakini baada ya miaka 10 waliondoka kwa aibu wakiwa wameshindwa. Waingereza pia walishajaribu kuitawala Afghanistan miaka ya nyuma lakini wakashindwa. Afghanistan haitawaliki!

Swali tunalopaswa kujiuliza hapa ni kwamba: Kwa nini wa-Afghanistan hawatawaliki wala kushindika? Pamoja na sababu zingine za kijamii, kitamaduni na kihistoria, jibu rahisi linalotajwa sana ni utashi wao. Hakuna silaha hapa duniani inayoweza kuushinda utashi wa binadamu anayetaka kuwa huru, mtu ambaye yuko tayari kuutoa uhai wake ili kulinda akiaminicho, hadhi yake na watu wake. Majeshi, madege ya hatari yanayojiendesha yenyewe, mabomu ya kiatomiki na satelaiti zenye uwezo mkuu wa uoni kamwe haziwezi kufua dafu mbele ya utashi wa mtu aliyedhamiria kuwa huru. Kama unabisha kamuulize Hosni Mubarak atakwambia.

Natamani sana kama Waafrika tungejifunza kitu kutoka kwa wa-Afghanistan. Ati ingekuwaje kama tungekataa kutawaliwa na wanasiasa madikteta na mafisadi ambao lengo lao ni kushibisha matumbo yao yasiyoshiba? Ingekuwaje kama tungesimama kidete na kukataa kuchezewa na majibwa ya Kimagharibi? Ingekuwaje.....? Leo hii tungekuwa wapi?

Ni kwa sababu hii natamani kuwa m-Afghanistan masikini sana asiyejua kusoma wala kuandika lakini ambaye hataki kutawaliwa. Na hii ndiyo fikra ya Ijumaa hii. Wikiendi njema!